絲絲講場：情人節消費平均千八蚊

閣下今日打算使幾多錢？跟大隊最安全，調查話港人平均預算係1,800蚊。識做啦。

亞太第三 唔夠中台豪

咁敏感嘅日子，為免同另一半有不愉快事件，最好有研究數據揸手。萬事達卡公布情人節消費調查，仲打孖上，分別係《愛情指數》與《2017下半年消費者購買傾向調查報告》。

報告顯示，66%港人打算今個情人節為愛侶送上禮物，情人節消費平均1,800港元，亞太區排第三，落後於內地及台灣；唔夠香港豪嘅係新加坡及泰國，分別排第四及五。

港人呢類「感性消費」（Sentimental Spending）金額，自一五年起升咗9%，總交易量亦增33%，可謂價升量亦升。

點使法？舊年港人喺餐廳與酒店嘅消費，分別佔情人節期間總交易額嘅46%及18%，佔總交易量嘅78%及10%。同時，有關交通（如旅遊）嘅交易數目更錄得179%增長，佔消費總額16%。

亞太區邊度嘅人喺情人節最捨得使錢？

情人節禮物之選

興送花 買珠寶Cheap咗

情人節大餐又點少得！約三分之二（64%）人計劃情人節出外用餐，但有四分之一（25%）就寧願留喺屋企浪漫。

講到情人節禮物，舊年港人買鮮花嘅總金額較三年前升咗17%，交易量亦增29%。相反，珠寶嘅銷售額就跌咗24%，交易量則微升2%。換言之，雖然送珠寶嘅人微微多咗，但價錢就Cheap咗一大截。

畀另一半埋怨未有慶祝計劃？絲絲送你一個理由解畫，香港人係唔到最後一刻都唔會使錢嘅！數據顯示，27%港人等到最後一刻，即係喺二月十四日正日先會進行情人節相關消費嘅。

余絲韻