絲絲講場：Fb朱仔暗請形象特工？

借民調了解公眾認知

話說有位原先喺大型廣告商擔任產品策劃營銷活動嘅打工仔麥金（Tavis McGinn），佢喺舊年喺Fb市場研究部門搵工，但面試到一半嗰陣，面試官話有一個職位更適合佢，就係幫助Fb創始人兼CEO朱克伯格（朱仔）打造公眾形象。

麥金嘅職責就係喺全球進行民調，關注各個群體對朱仔嘅睇法。例如佢哋「點解喜歡朱仔？」、「係咪相信朱仔？」等等。

麥金認為，Fb試圖理解CEO朱仔嘅公眾形象，唔單只淨係通過畀Like嚟衡量。如果朱仔發表一篇演講，內容談論到移民、全面醫保同教育公平等問題，咁Fb就會追蹤所有朱仔講到嘅話題，觀察全美不同地區公眾嘅反應。

好多科技公司會做民調嚟評估公眾對品牌嘅認知，有時調查都會涉及公司創始人同CEO，但請一位全職員工專門監控CEO個人公眾形象就唔常見，而Fb對有冇麥金呢個職位亦不予置評。據稱，Fb喺兩年前就開始監控朱仔嘅公眾認知，公司亦經常喺朱仔個人Fb帳號上發布公告同聲明。朱仔家陣喺Fb上大約有1億個粉絲。

余絲韻