Market Insight：金融股候跌定分注買

早兩日古勝行過銀行大利市機，見到個個前呼後湧，人人大喊All in撈底，在下經已覺得唔多妥。周二晚道指報復式反彈567點，港股黑期升住800點，撈咗貨的股民個個晨早擦靚棚牙，攞住刀叉準備食大餐，點知昨日個市一開無耐便級級落，到尾市隊穿埋周二大跌市低位30,577點，意味今個星期，逾6,000億元成交撈底的，又要變成蟹民。

恒指昨日收市倒插272點，收報30,323點，睇番一七年最後交易日恒指收報29,919點，意味只係相差約四百點跌幅，今年港股就宣布打回原形。

A股失火 大媽班資回朝

昨日好明顯見到，港股比美股形勢更不堪，技術反彈造就大戶逃生機會，講到尾又係「A股化」累事。睇番上星期美股大跌，周一本地基金全力減磅，最終恒指由最多跌889點，到收市僅跌356點，當日滬深南下淨流入資金達102.3億元人仔，真係有外資大平賣，大媽單天保至尊的氣概。

可惜事與願違，當晚美股再插過千點，周二港股低開低走，恒指大插1,649點，但大媽依然唔信邪，北水淨流入額度仲有80.2億元人仔，仲係比上周日均的44.1億元人仔多。

到周三，滬綜指再跌1.8%落到3,309點，跌穿今年開出的第一口價3,314點，真真正正後欄失火，大媽自顧不暇，再理唔到個港股咁多，昨日北水不入反出，錄得8.7億元人仔淨流出，是自去年十二月二十日，差不多一個半月以來最曳。北水班師回朝，亦解釋了點解港股昨日一彈即散，可以預見，美股彈港股未必有運行，而A股唔彈港股都幾難搞。

防守股失避風港作用

有退休老友問在下有乜可以撈底，老實講，今浪跌市起因是美國就業數據勁、稅改及油價回升，令華爾街對未來通脹預期迅速升溫，郁到個十年及三十年長債息，觸發基金沽盤。展望通脹及利率升勢，可能比預期來得更猛之下，傳統被視為穩陣的防守投資，如公用、收息及房託基金，因為息差優勢頓失，暫時都發揮唔到到跌市避風港作用。

反而，銀行及保險一類，對長息升多於短息有着數的金融股，長遠還是能夠從中獲益。等滙豐控股（00005）穿埋80元，跌定之後大把機會買貨。

內銀股方面，工商銀行（01398）及建設銀行（00939）近日由高位回調11.3%及13.7%，短期調整幅度都唔細，如果可以再落多3至5%，都可以開始諗吓，可以分階段入市方式將部分本錢放入去。

古勝