絲絲講場：卓百德醒你買股通勝

佢兩父子近年喺農曆新年前都會出「小通勝」，根據五行講講佢哋對嗰年個市嘅睇法。今個狗年，佢就特別睇好紙類、衣服類股份，但就睇淡賭股類。

估紙業大旺 賭股要避

根據呢個「小通勝」解釋，今年係土狗之年，五行之中以火為最旺，而由於木生火，屬木股份例如紙類股、傢俬、衣服類股份大旺。屬火股份就緊接其後，例如電子、電器、科技產品或服務等。土類股例如煤礦、建築類，狗年只能望佢平平穩穩。

至於屬金屬水嘅，狗年就最差，例如貴金屬、船運、賭、銀行等股份，大家就要避一避。不過，閣下若夠專業，倒轉玩沽空亦得。

卓百德父子又話，火旺之年，經濟通常比較差，二月股市有機會出現調整，但唔會跌太深，並有機會喺下半年逐步恢復，但高位就唔會超越上一次嘞。

佢哋又提到，要有心理準備，狗年個市有機會突然急跌，叫大家揸吓Cash，嗰啲會喺經濟調整時易受拖累嘅炒貨，就要減定倉。佢哋仲話，美市對經濟放緩尤其脆弱，至於歐洲經濟增長雖然未係好靚仔，但最壞時刻已過。

余絲韻