Market Insight：待確認見底再部署
道指周一大跌逾千點，拖累港股昨日狂冧逾1,600點，即市一度失守50日線，主板成交達到2,581億元，乃一五年大時代以來新高。本來以為恒指上午大裂口低開，下午點都有得彈吓，點知彈唔起，尾市仲要一度失守50日線（30,590點），情況比預期的差。
昨日執筆時，外圍股市跌幅見收窄，但眼前環球金融市場動盪涉及股、匯、債市場，在資金亂竄之下，難料走向，持貨唔多，惟有翹埋雙手，等跌定再作部署，免得沙塵滾滾，殺錯良民！
北水減 削弱承接力
回看○七年，恒指曾在單月由24,000點跌至19,000點，再在兩個月後創出31,958點當時的歷史新高。到底今次港股會唔會歷史重演，古勝都冇水晶球，只係覺得，即使個市真係未調整完，正所謂「吊頸都要抖抖氣」，更何況來得調整浪頗急，除非基本因素急劇轉差，否則亦不要輕視反彈力度。只是一月以來股市升得真係好急，眼前已是遲來的調整，就以一顆平常心來看待。
騰訊控股（00700）股價由高位476.6元，眨吓眼落番昨日低位僅407.2元，乃去年十二月上旬以來首次再度失守50日線，今次能唔能夠迅速收復失地，還須觀察，惟見春節前北水動力明顯有所放緩，唔多唔少影響承接力。若以高位回落至昨日低位計，跌幅已接近15%，若屬短期正常調整，應該差唔多。不過，萬一外圍市況再現恐慌，穿一穿400元亦唔係冇可能，想撈貨都係盡量分注行事，以控風險。
大摩發表研究報告，話短期市況調整最好見到以下四個情景中至少兩個，最理想係三至四個情景出現才能確認見底。首先，恒指回落至風險/回報水平相等於較該行今年預測的基本情況下之目標（31,500點）有5至10%上升空間，即28,350至30,000點水平；其次是美國長期國債孳息率穩定回落及美元靠穩；第三是最近蜂擁入股票基金/香港窩輪市場的趨勢逆轉；最後是分析員由調高盈利預測轉變為下調預測。
既然古勝日所提及的30,800點在毫無爭持下已失守，午後反彈亦顯然要力壓其下，短線若真的確認失守50日線支持，今浪最差情況可能要落到28,500至30,000點水平始能喘穩。
有實力仍須分注買
香港交易所（00388）昨日股價一度落過266.8元，股市有波幅成交大，理論上更有利港交所收入。但當然，波動過後市況是更上層樓抑或死寂，又係另一回事。早前在下都講過，留意喺260元樓下加注或翻兜港交所，點知其股價頭也不回抽到上300元樓上，升緊無謂追，估唔到一個月多啲又可以到番心儀入貨價。但點都好，同上述提及騰訊的策略一樣，有實力作中長線投資都要分注買，呢啲市咪再諗短炒一注獨贏！
古勝