絲絲講場：前輪王于正人轉戰財管
呢排輪證市場同股場一樣咁暢旺，唔知買開衍生工具嘅投資者有冇諗起「前輪王」于正人（Johnny）呢？究竟早排放假嘅佢有咩新動向呢？
仲記得，瑞銀亞洲股票衍生產品銷售部前董事總經理Johnny舊年十一月起開始放Garden Leave（離職前嘅有薪假期），告別輪場。正當絲絲估佢會否另謀高就，一踏入二月就開估，原來佢冇轉到公司，只係轉部門。
老友開戶口撐場
Johnny今日（二月一日）開始轉去瑞銀財富管理部工作，以「Desk Head」身份帶領一隊香港財富管理團隊，為資產值達200萬美元（約1,560萬港元）嘅私銀客戶管理財富。
Johnny話，期待新工非常有趣同具挑戰性，而更高興係佢可以同舊戰友、現為瑞銀財富管理執行董事李靄欣（Anita）再度共事。佢仲話之前做輪證認識唔少朋友，唔少都話會開戶口支持佢。轉部門係唔係再賺多啲？Johnny好口密唔講，只係提到之前佢推咗其他窩輪發行商叫佢過檔嘅邀請。
休息咗三個月，Johnny話朋友話佢肚腩大咗少少：「冇計，放假終於有時間見番好耐冇見嘅朋友，幾乎日日都出外食午飯晚餐。早前又同太太去咗日本同上海玩，好食好住。」
沒錯過港股升浪
做得財富管理，咁Johnny自己嘅投資理財又點呢？佢話投資銀行對員工嘅股票買賣好嚴謹，所以自己都冇增持股票。
不過好在多年前佢已經持有多隻投資中國或香港股票嘅交易所買賣基金，又有啲藍籌金融股，所以都冇錯過近一年嘅港股升浪。
余絲韻