Market Insight：中資股長短策略有別

執筆時尚未知道美國總統「侵侵」的國情咨文會講咩，投資者關心的當然係中美貿易關係會否惡化。當然，睇到最近美國財長同「侵侵」呢頭話「弱美元」利美國經濟，嗰頭又話支持「強美元」，反口覆舌唔知邊句真！

顧及大媽收爐效應

回說港股，股王騰訊控股（00700）股價回落至接近10日線水平，昨日收報461.8元。去年十一月的調整浪中，騰訊股價一度失守50日線始重拾升軌，如今50日線處420元，會唔會見番呢啲位？古勝只能夠講，冇咩係冇可能，想買貨的，望就望佢落番呢啲位，但真係落到呢啲位，敢唔敢入市買又係另一回事！

唔少揸咗內銀股的股友問，揸住貨使唔使沽貨走人。在下認為A股氣氛有改善係事實，去年度內銀股業績改善亦係大概率的事，呢轉內銀大翻身，唔係純炒作咁簡單。所以，若作為中長線收息之用，古勝認為大可以繼續坐定定。至於短線策略，理佢咩股，反正短炒買錯邊跌超過15%要嚴守止蝕係紀律，之後因應情況加沽抑或買番貨係後話。

藍籌中國人壽（02628）及中石油（00857）雙雙發出盈喜，情況同上述內銀股相似，季內公布的去年度業績改善，基本上已在市場預期之內，故如今發盈喜之類，未必能再對股價起太大的刺激作用。反之，短線大媽收爐效應之下，中資股承接要受考驗，高位沽咗貨獲利，啲錢可以袋暖啲，睇定啲先至再分注行事。

中糧包裝（00906）在本月中旬由5.6元水平急抽上高位見過7.28元，近日隨大市回落，昨日收報6.55元，又落番承接區。對於中糧包裝，也許內地投資者比香港投資者更感興趣，皆因早前中糧包裝宣布，對清遠加多寶增資，持股30%，而加多寶品牌正是內地家喻戶曉的消費品牌，佔內地涼茶行業市場逾五成份額，相信中糧包裝今次增加投資，能受益於加多寶的發展。

中糧包裝有望「入圍」

此外，最近中糧包裝透過管理層售股引入復星恒利等機構，料有利推動旗下醫藥包裝業務的發展。

以中糧包裝現時市值接近77億元來看，年內有條件入圍港股通標的股，若順利獲北水眷顧，股價有望更上一層樓。現價往績市盈率20倍，息率2厘，在盈利前景樂觀之下，估值具吸引力，股價回落至6.5元或樓下又是分注收集的時候，下一浪目標睇7.5元，重要支持在5.5至5.6元水平。

古勝