62歲先轉工？邊個話唔得！講緊嘅係惠普（Hewlett Packard Enterprise，HP）前主席惠特曼（Meg Whitman）。
惠特曼舊年七月退任惠普主席一職，十一月再宣布連CEO都唔做，原來佢係去謝菲基辛堡（Jeffrey Katzenberg）嘅初創媒體公司NewTV做CEO，今年三月就上任。
今年62歲嘅惠特曼，喺科技及政治領域享負盛名。佢九八年接掌eBay嘅CEO一職，在位十年間令eBay由只有30名員工嘅公司，發展到80億美元年營收嘅巨企。佢一一年加入HP，更主導HP史上最重要嘅業務分拆，聽講宣布佢退任CEO嗰日，HP股價跌近6%！
至於佢嘅新老闆謝菲基辛堡亦唔嘢小，當年有份同史提芬史匹堡一齊創辦夢工場影業。至於現時呢間NewTV，就專注出版流動裝置使用嘅十分鐘內高質短片，主打18至34歲族群，目前未確定係採用廣告抑或訂閱經營模式。
今次呢位野心唔細嘅惠特曼踩入流動媒體界，怕且業界會刮起一場新風暴。
余絲韻