絲絲講場：邊行最Buy高檔酒？
有人稱葡萄酒為「液體黃金」（Liquid Gold），除咗飲仲可買嚟投資收藏。估吓做邊行嘅最愛Liquid Gold？
威揚酒業（08509）CEO（行政總裁）王姿潞（Shirley）話，佢哋公司嘅個人客戶入面，原來有好多醫生同律師。點解佢哋咁鍾意買酒？真係望唔透。
咁啱有機會上到Shirley公司參觀，當然要睇吓佢哋珍藏嘅，就畀絲絲見識到支成個人仔咁高嘅紅酒！聽Shirley講，呢支法國Château Pavie一二年出產嘅27公升紅酒，全球得9支，佢哋公司就收藏咗3支。27公升，足足等於36支750ml嘅標準裝！值幾多錢呢可？
上市搞慶功帶來生意
講到價錢，先睇吓支酒旁邊個「巨人」尺寸嘅水晶醒酒器，全球限量得5套，當年推出嘅拍賣價就高達200萬元。一個醒酒器嘅價值都七位數字，其他自己諗啦。
講番呢類咁大支嘅酒，到底咩情況會開兼飲得晒？Shirley話，早排佢哋公司上市慶功宴就飲咗幾支18公升嘅酒，仲引起間酒店嘅興趣，將會同佢哋合作添，相信客人見到都會覺得好新奇。估唔到一場上市慶功宴，就多咗單生意！
余絲韻