股壇老行尊張天生勸散戶見好就收

互聯互通 港股變賭場

張天生接受訪問時指，香港股市在滬深港通下，形勢已不同，「香港美其名係國際金融中心，其實都係被人利用嘅賭場。」他又說：「大媽炒股唔係炒經驗，都係希望以小博大，揸住100萬元想賺好多倍嘅心態！賺咗會再按，雪球愈滾愈大。」

他又直言：「股市無專家，自己要計自己數。炒股始終就好似賭錢，係要講運氣，肯蝕其實仲叻過賺錢個位！」

張天生今年八十歲，於五八年入行，由「紅褲仔」做起，屬香港第一代股票經紀，今年剛好從事證券業六十年，見盡無數次股市起跌，八三年因為移民「金盆洗手」，早已「視富貴如浮雲」。

曾賺兩層樓 股災輸凸

「七十年代初有買股票，七一年仲賺過兩層天后廟道嘅樓返嚟，但七三年股災，恒指由1,700點跌到150點，結果輸凸，兩層樓都斬埋，七六年股市再起，我慢慢再賺番，但八三年舉家移民澳洲，為咗安頓好老婆仔女，畀佢哋入籍，我決定完全唔炒股票，只係代客買賣，最後揸住嘅兩萬股中電（00002），八四年都沽晒！」

正因如此，八七股災他安然度過，「當時我頭腦好清醒，個市已經好癲，我已經叫客戶唔好做孖展，當然最後個客都有輸錢，但無欠公司錢喎，停市四日復市後，全公司買貨最多嘅係我啲客！」

雖然避得過股災，但未能受惠港股之後幾次大升浪，例如○七年、一五年，甚至是今次大升市。不過，張天生直言：「大升市我真係一啲都無恨過，我日日有佣金收，晚晚瞓得着，好安樂。記得七一年因為炒金，擔心外圍發生突發事件，晚晚瞓唔着，呢啲經驗唔好受！」他又說，魚翅撈飯、夜夜笙歌的日子，他年輕時已經嘗試過。「嗰陣時賺到錢，晚晚收工之後去夜總會搵客，個個周末去台灣玩！」

他對現狀感到滿足，長年居住「風水屋」太安樓，每日返工，直言「誓不言休」，「我冇諗過退休，退休我做乜？依家我有幫客買股票，客戶都係上咗年紀，將來自己隻手拎唔到電話先會退下來！」