絲絲講場：蓋茨喬布斯 千金大鬥法

馬術競賽各勝一仗

蓋茨女兒珍尼弗（Jennifer Katharine Gates）現年22歲，喬布斯女兒伊夫（Eve Jobs）現年20歲，均就讀史丹福大學。珍尼弗喺6歲接觸馬術運動，伊夫亦喺細個嘅時候愛上騎馬，兩人至今仍熱衷呢項運動，仲不時參加比賽，兩個靚女騎喺馬背上英姿凜凜，有姿勢有實際。兩人仲曾經兩度喺比賽上碰過頭添。

邊個勁啲？據美國馬術協會（USEF）嘅障礙賽排名榜，珍尼弗排名19，伊夫就排第23，相當緊貼吓。喺USEF嘅賽事入面，珍尼弗自一四年八月以來共贏12.08萬美元獎金，伊夫亦自一六年四月以來已贏走15.93萬美元。

珍尼弗話將馬術運動納入未來職業考慮，依家希望睇多幾年先，再睇吓條路點行。而伊夫就話自己花咗好長時間去搵交友、讀書同騎馬間嘅平衡，結果認為最好係將自己覺得最重要嘅放首位。即係邊樣？伊夫冇講喎。

Apple股價跑贏微軟

以馬術成績與馬上英姿計，喬布斯與蓋茨兩位千金不相伯仲，論兩位科技大佬嘅公司股價表現，喬布斯創辦嘅Apple舊年初以來累漲逾54%，力壓蓋茨間微軟同期約45%嘅升幅。

余絲韻