絲絲講場：比特「弊」！滙豐簡世勳救咗阿女

比特幣受內地及南韓監管影響而冧價，全線虛擬幣都大瀉。據Cryptocompare，比特幣截至尋晚七時報11,239美元，盤中價甚至跌穿過一萬美元，低見9,189美元，最大跌幅達12.17%，重回舊年十一月水平。

累挫五成 大行估跌多一半

今次比特幣血流成河，滙豐高級經濟顧問簡世勳就救咗佢阿女一命。佢話阿女早前問好唔好投資虛擬貨幣，佢叫個女唔好掂，話虛擬貨幣存在泡沫。睇番虛擬貨幣今個星期嘅境況，相信佢個女要多謝佢咁話。滙豐環球新興市場外匯分析主管梅克亦話，虛擬貨幣透明度不足，即使背後有創新科技支持，亦難以斷定其價值。

比特幣跌咗一半，瑞信分析員Damien Boey話，按比特幣發行規模與美國政府發行嘅「BBB」評級債券收益率計，現時比特幣嘅合理價值只係現價一半，大約6,000美元！美銀美林總裁Brian Moynihan亦炮轟虛擬幣，話顧客可以買比特幣，但購買渠道就「唔會係美銀」嘞。

比特幣來回天堂地獄，未知能否折返人間，大家扣好安全帶未？

余絲韻