絲絲講場：華為搬竇去東莞平賣樓益員工？
上年華為全年銷售收入預計約6,000億人仔，同比增長約15%。據內媒分析，華為上年業績大豐收，證明董事長任正非撤離深圳係英明嘅決定。其實早喺一六年，任正非就炮轟深圳房價太高，大大提高華為請人嘅成本。
任總話：「140年前，世界中心喺匹茲堡，因為有鋼鐵。70年前，世界中心喺底特律，因為有汽車。依家世界中心喺邊？唔知，因為會分散去低成本嘅地方，高成本會摧毀競爭力。」
手機研發留守深圳
踏入今年，配合大遷徙，華為內部傳言指公司會分配福利房畀東莞松山湖新基地嘅3萬名員工，每平方米只賣8,500人仔，低過市場價70%，仲送埋精美裝修！按照規定，東莞福利房前5年係租賃，期滿後由員工購買（員工擁有完整產權），購買5年後先可以轉讓，即係話總共10年後先可以轉手。
講真，深圳呢幾年樓價暴漲，人力同土地等成本都愈來愈高，迫到華為搬去東莞。華為內部消息指，除咗華為手機研發會留喺深圳，無線部分、華為大學、研發中心、中試中心等都要搬晒去東莞松山湖華為基地。
余絲韻