絲絲講場：撲克女王轉做對沖大鱷
有「德州撲克女王」之稱嘅Vanessa Selbst，告別撲克界後，加入咗由「鱷王」達利奧（Ray Dalio）創辦嘅全球最大對沖基金Bridgewater，從事交易同策略研究。睇嚟對沖基金面對科技企業互搶人才，焗住要用其他方法谷基金表現。梗係啦，Bridgewater管理資產規模有成1,600億美元（約1.25萬億港元），唔上心啲點得？
加入Bridgewater跟達利奧
Selbst前排喺Facebook宣告結束職業撲克生涯，佢喺告別信入面提到，「整體嚟講，新環境有啲似之前打撲克嗰時，同班「書呆子」合作打敗對手。」
依家33歲嘅Selbst出晒名係牌風激進，賭枱上成日咄咄逼人，目前佢職業線下賽事錦標賽累積收入為1,190萬美元（約9,282萬港元），係所有女性牌手中最高。
Selbst似乎幾滿意依家喺Bridgewater嘅生活，佢話每日雖然好攰，但有新嘢學又好興奮，「就算前一日我覺得我掌握到某件事，但第二日可能挑戰失敗，勝在不斷有新嘢學。」
余絲韻