絲絲講場：8新股敲鑼要分上下場
今年一月新股市場熱爆，至少27隻排緊隊等上市，投資者花多眼亂之餘，香港交易所（00388）亦應接不暇，下個星期每日都有新股敲鑼。之但係最熱鬧莫過於係十六號，皆因嗰日有8隻新股齊齊掛牌，簡直史無前例，仲誇張到要分上下場敲鑼添！
恆宇特登揀下晝
絲絲記得，上個月6隻新股首掛嗰時，紀念品多到要放地下，唔知十六號嗰日又會點呢？睇怕出席人士逼到連搵碇企都難！而絲絲收到風，嗰日有7隻新股選擇上晝九點半敲鑼，而澳門承建商恆宇集團（02448）就喺下晝一點掛牌。聽講有關安排係恆宇自己揀！
至於選擇上晝掛牌嘅7隻新股就有本港物業投資公司晉安集團（02292）、物業開發商光大永年（03699）、手袋股森浩集團（08285）、新加坡資產管理公司杰地集團（08313）、新加坡音響及通訊服務解決方案供應商ISP Global（08487）同埋福建內房正榮地產（06158）等。根據以往嘅經驗估計，相信嗰日可能有300人逼爆交易所個場！
光大晨咁早入場
咁多隻新股一齊登場，啲公司梗係要就一就。好似光大永年已經邀請咗傳媒嗰朝七點半登記入場，上市儀式由八點開始，預計十一點三完結。孖展超購約100倍嘅森浩集團就話致詞只係得一分鐘，晉安暫時話無乜嘢特別安排。股民不妨拭目以待！
余絲韻