絲絲講場：貝索斯身家8198億破晒紀錄
網購巨人亞馬遜有幾成功唔使多講，股價舊年急升近56%後，今年繼續升唔停，首五個交易日再累升6.6%，周一收報1,246.87美元，帶挈舵手貝索斯嘅身家升至高達1,051億美元（約8,198億港元），打破微軟創辦人蓋茨九九年所創嘅紀錄，真正成為歷史上最疊水嘅首富。
蓋茨行善 屈居第二
有報告顯示，自去年美國「黑色星期五」以來五周，亞馬遜喺主要零售商中獨攬了高達89%網購生意，唔怪得股價係咁升。
睇番彭博億萬富豪指數，貝索斯舊年十月已經憑938億美元身家超越蓋茨，一個月後隨着假期消費旺季展開，貝索斯身家首次突破1,000億美元，但仍未超越蓋茨九九年科網泡沫時期嘅身家。
根據紐約時報資料，蓋茨喺九九年嗰陣，個人財富曾經達到過1,000億美元。但依家貝索斯已經成為喺蓋茨之後，又一位個人財富觸及12位數，即1,000億美元嘅億萬富豪，並且超越咗蓋茨嘅巔峰時期，創造咗人類個人財富嘅歷史最高添！
但係，其實貝索斯咁快能夠成為史上最疊水嘅首富，都係多得蓋茨將巨額身家捐咗出嚟做慈善。自九六年以來，蓋茨共捐咗近7億股微軟股份及29億美元現金和其他資產，如果蓋茨冇捐出身家，依家身家應超過1,500億美元（約1.17萬億港元）。
股神及朱仔排三四
之不過，蓋茨依家仍然以933億美元身家，喺全球排第二，佢老友股神巴菲特就以872億美元排第三，Facebook創辦人朱克伯格以775億美元排第四。
余絲韻