絲絲講場：股神贏十年賭局益咗...

話說○七年，股神同一個對沖基金大戶輸賭，佢深信低成本嘅標普500指數基金未來10年表現，實會跑贏管理費貴到爆嘅對沖基金。結果，十年過後，截至上周五美股最後一個交易日，標指500指數基金10年複合增長7.1%，砌低對沖基金Protege Partners同期投資嘅一籃子避險基金平均2.2%回報。

對沖大鱷舊年已經跪低

股神巴菲特最後贏咗賭局，但真正嘅大贏家其實係慈善機構奧瑪哈女孩協會（Girls Inc. of Omaha）。奧瑪哈女孩協會除咗袋走原有嘅100萬美元賭注，拜賭局中途有變所賜，仲會得到巴菲特旗下投資旗艦巴郡B股股票。

原來，巴菲特同Protege Partners當年開始賭局，原本各自用約32萬美元買債券，因為債券有望10年內增值到100萬美元。而因為債券嘅增值速度快過預期，雙方一二年都同意買巴郡B股股票，依家股票大概值220萬美元。

其實，早係舊年底，該對沖基金創辦人塞德斯（Ted Seides）喺自己嘅專欄已承認自己注定會輸，但佢就心有不甘解釋話：「巴菲特之所以會贏，好大原因係佢運氣好，而唔係因為自己差！」嘩！好酸呀！

余絲韻