孖妹S檔案：刨熟FinTech通識 包你有賺

薛：恒生銀行（00011）首席經濟師 薛俊昇

方：香港資訊科技商會榮譽會長 方保僑

彩兒：你估啲朋友拆咗我哋份禮物未？

Kitty：拆咗喇啩，應該會有啲失望。嘻嘻。

彩兒：希望佢哋真係會認真睇喇，唔好嘥晒我哋啲心機。

Kitty：咁不如每晚臨瞓前，你讀一篇我聽！

虛擬貨幣篇：比特幣（Bitcoin） 價癲炒味濃 玩家需小心

Kitty：咩係比特幣？

彩兒：早喺○七年，比特幣嘅誕生，係多得諾貝爾獎得主哈耶克，佢出咗本書叫《貨幣的非國家化》，問既然商品、服務都係自由競爭最有效率，點解貨幣要被國家壟斷。

Kitty：哈耶克好醒！因我一直唔明，點解美元係全球儲備貨幣？中國揸住好多美元，跟住○八年後美國連番QE（量寬），美元兌人民幣貶值，中國好無辜，似變咗水魚。我睇好比特幣。

彩兒：比特幣早排升至2萬美元，呢幾日就曾狂跌到近12,000美元！好鬼恐怖啊……

薛：比特幣唔係一個貨幣，因貨幣價格應該要幾穩定，但比特幣價格大上大落，炒作味濃。大家諗住賺大錢之餘，都要小心。

彩兒：我聽人批評，話比特幣無內在價值；世界銀行亦話比特幣係自發形成嘅龐氏騙局。

Kitty：我自己掘算。比特幣嘅世界，每10分鐘會生成一個數據區塊做紀錄，只要我做個叻叻「礦工」，搶到做「會計師」，賺到區塊內嘅「比特幣工資」，我就有大把比特幣！

彩兒：貪字得個貧。

恒生薛俊昇認為比特幣價格波動，炒作味濃，呼籲投資者要小心。

香港資訊科技商會方保僑指，很多人會混淆移動支付及電子錢包。

央行擬發行 料非易事

Kitty：聽聞有央行想出虛擬貨幣，咁係咪死硬？

薛：出虛擬貨幣同比特幣嘅意義有啲唔同。央行出虛擬貨幣，主要想喺推貨幣政策時更靈活，好似之前國家經濟唔好，要推負利率，擺錢入銀行就倒蝕，放落床下底仲好；但有咗虛擬貨幣，佢唔似銀紙攞得走，就少咗呢個煩惱，幾負利率都得。不過，央行最終出唔出，都要睇番央行決心同民眾接受程度。

Kitty：過老人家嗰關最難。

方：出虛擬貨幣，可以令國家貨幣流通量加大，非洲國家比較有興趣。以前央行出口術，會影響貨幣升跌，但虛擬貨幣無中央銀行喺背後操縱，純粹靠供求影響升跌，照理會公平啲。不過有啲矛盾，央行發行啲央行干預唔到嘅虛擬貨幣。

籌錢篇：首次代幣發行（Initial Coin Offering，ICO） 初創向玩家籌虛擬貨幣

Kitty：IPO聽得多，ICO是咩呢？

彩兒：IPO即首次公開發售，一般應用於新股發行；ICO就係向公眾籌集虛擬貨幣，ICO通常係初創企業嘅另類集資方法。IPO發行股票，ICO就發行代幣，整代幣嘅技術就係區塊鏈。代幣由初創企業出售，然後投資者可以用傳統虛擬貨幣，例如比特幣換取代幣。跟住初創企業就可以再用融資番嚟嘅虛擬貨幣換番法定貨幣。

Kitty：嘩！創一個代幣，換番法定貨幣，咁筍嘅。我又搞番間初創先。

彩兒：ICO融資活動欠監管，真係要小心啲，唔好墮入投資騙局。

眾籌（Crowd Funding） 網上集資 產品當期貨賣

Kitty：仲有咩籌錢方法？

彩兒：眾籌係一種經互聯網集資嘅方式。之前就有兩個80後推出套西遊記Board Game，喺眾籌網籌到330萬元呢。

方：以前初創企業會問天使基金同私募基金集資，但壞處就係被攤薄股份，眾籌就將你啲產品當期貨咁賣，初創畀出產品，就收到錢。不過，眾籌唔好就係，無天使基金同私募基金嘅專家畀意見你。

Kitty：識賺錢，都要識使錢。依家啲嘟嘟卡有幾多種？

方：好多人會搞亂移動支付同電子錢包。所有喺手機平台畀錢嘅就係移動支付；電子錢包就係連接金融包或銀行帳戶，可以裝好多張信用卡喺入面。第時添香油都可以用電子錢包。

投資篇：FAANG（Facebook、Amazon、Apple Inc.、Netflix和Google） 明年恐未能延續強勢

彩兒：Facebook、亞馬遜、蘋果公司及Netflix股價年內升逾五成，Google母公司Alphabet亦升超過三成，跑贏年內標普500指數的升幅。一七年真係科技股玩晒！

薛：未來發展朝高科技走，所以一七年科網股咁爆。但見大家一窩蜂咁買，市盈率咁高真係要注意風險。

彩兒：你啱！摩根士丹利預期，FAANG喺一八年或未能延續今年強勢，因FAANG今年貢獻標普500指數漲幅逾24%，過往升幅排名前五位股票平均貢獻指數嘅比重約22%，今年達24%，為過去20年來第三高，僅次九九年及○四年。資金一窩蜂追逐FAANG，未必係好事。

Kitty：睇市盈率，亞馬遜同Netflix最癲，分別錄得接近300倍及逾190倍。FAANG佔美國總市值逾10%，咁健唔健康？

薛：美國經濟愈嚟愈依賴高科技推動，佔比愈嚟愈大都係無可厚非。

除金融科技嘅勁Terms外，金融界近年仲有以下幾個熱爆嘅潮語，字眼都係講緊政策，呢啲政策發展到底如何？

英國：英國脫歐公投（Brexit） 談判料傾成 英經濟無礙

彩兒：上年六月，英國通過脫歐（Brexit）公投，但一直傾唔掂英國應該畀歐盟幾多分手費，最後英國同意支付逾500億歐元分手費。第二個階段，就到傾經貿談判。

Kitty：要趕喺一八年三月歐盟峰會前提出建議係難，因英國內閣分裂，有啲想割席，擺脫歐盟規定；有啲想藕斷絲連，接近歐盟單一市場。

薛：英國經濟前景唔係太差，預料一八年經濟增長率會徘徊2%。脫歐對英國貿易同金融業嘅負面影響唔係好大。再者，我估脫歐談判最終會搞得掂，因英國係歐盟其中一個主要出口國，所以歐盟都會想同英國傾得成。英國近幾年財政預算，都提到利用減稅同增加免稅額，吸引外地投資同提高國家競爭力。

中國：去槓桿（Deleveraging） 內地高借貸企業宜警惕

Kitty：英國脫歐對中國經濟有冇大影響？

薛：英國本身唔係中國主要出口國，中國主要出口去東盟、歐元區同美國，英國脫歐對中國無直接影響。中國經濟穩定，人民幣回穩，中國債市將納入國際核心債券指數，都有利吸引外資流入中國債市。

Kitty：中國出力去槓桿，內房會唔會遭殃？

薛：對中國高借貸公司會有影響，投資內房股前，應該要細心分析其財務狀況。

日本：安倍經濟學（Abenomics） 日迷失廿年 靠三箭解救

彩兒：日本首相安倍晉三於一二年再任首相，提出安倍經濟學三支箭，至今實施咗五年，包括量化寬鬆貨幣政策、擴張性財政政策及結構性經濟改革與增長策略，以推動經濟，刺激通脹，惟通脹仲未達2%目標，但的確令日圓貶值，提振出口。

薛：安倍經濟學係有用，令日本脫離通縮，消費者物價指數重回正軌，經濟維持增長，最近日經平均指數觸及九二年高位。但日本經濟迷失廿年，需要長啲時間復甦。我估日本央行會繼續量寬，料美國聯儲局繼續加息，所以睇淡少少日圓。

美國：量化緊縮（Quantitative Tightening，QT） 美息魔出籠 有序縮表

彩兒：○八年金融海嘯，聯儲局連番推出量寬，經過逾9年量寬，7年維持低息，一五年開始QT加息，到今年十二月共加息5次，到1.25厘至1.5厘。

Kitty：揭開QE到QT新一頁！聯儲局今年九月廿日宣布，十月開始縮減總額達4.5萬億美元嘅資產負債表！首階段每月縮減100億美元，包括國庫債券及半官方機構債券及住宅貸款證券。其後每三個月縮減規模加大100億美元，直至達500億美元。

彩兒：歐日央行都未隨美加息，但歐洲央行都有減少量寬規模，加埋美國QT，有助減少市場資金流。

薛：明年聯儲局應該會加3次息，但料對美股同港股影響唔大。加息意味經濟向好，股市始終係由實體經濟支撐。儘管美國加息，香港資金充裕，都唔急住跟加。

彩兒、Kitty