Market Insight：內需股勢強博得過

官媒放風話樓市調控唔夠全面，似為更多限制措施擴展到三、四線城市鋪路，中國支撐經濟的國策指揮棒，風向可能又轉。由一四至一五年的炮製政策牛市，狂谷A股，到一六至一七年讓樓市起飛，接棒推進另一波財富效應，若明年壓抑樓市變本加厲，推動基建外，鼓勵內需恐怕不中亦不遠已，近排內地消費類股份蠢蠢欲動，不似空穴來風，短期可密切留意，在板塊內揀蟀。

相比康師傅及統一，本月上市隨即潛水的日清食品（01475），早排落到3.04元企住，再等多排消化一下IPO客投降沽盤，其實值得諗諗。

日清3元邊諗得過

一來內地即食麵市場未有咁快飽和（對比鄰近日韓市場），近兩年因手機外賣程式盛行，全國即食麵消費意外地倒退，料只屬暫時性，再者，預期日清的一八年估值低過康師傅同統一，大約是18倍，如果壓多浸落到3元邊，中長線應該諗得過。

北水湧港推升樓市

長假期前，港股矮仔上樓梯，趁成交淡靜推返上29,578點收市，升210點，回望由30,199點撻到落28,134點的2,065點跌幅，唔經唔覺已經收復跌幅的七成。

假期睇見新聞感慨良多，香港地產指數創歷史新高，即使辣招再辣，亦無阻北水湧港及父幹買家的熱情，港樓升到唔識停，今年累積升一成四。假期期間，國務院發布城市規模控制的文件，着力治理「大城市病」，預計到二○三五年上海市的常住人口控制在2,500萬左右。換句話，17年後上海市人口，比現時2,415萬只係多出3.5%。

反觀香港豆腐膶咁細，既無人口政策，房屋政策亦一塌糊塗，資本及人口進出之便，大家最終睇住一房新樓賣近千萬元嘩嘩聲，北水大媽落到嚟卻話抵買，難怪前局長周不時話香港樓市存有泡沫，身體卻是相當誠實，轉頭三十幾球入市掃樓。

炒比特幣忌瞓身

講開泡沫，一七年最常見的關鍵詞是比特幣（Bitcoin），今年一度累升廿倍。近日走勢認真誇張，聖誕前衝上2萬美元，眨眼撻落1.1萬美元再彈返去1.6萬美元，有朝一日，假如成為國際通行支付貨幣，都唔知受款一方點去對沖匯率風險。

交易成本太高

講到比特幣是否單純的泡沫，古勝唔敢亂講，始終歷史太短，打着反集權、反央行監管的虛擬貨幣，最後會否成功，目前也是言之尚早。

睇番過去一年，被日本及澳洲政府承認法定貨幣身份，再有航空公司及地產商接納作為支付貨幣，仲出埋衍生工具產品添，但作為曾經投資比特幣，算是搭過一陣順風車的過來人，依家想用比特幣消費其實唔容易，因為交易成本太高，投機價值肯定遠超乎應用價值。

但講到買唔買得過，由過去歷史去看，這虛擬投資工具都唔係未試過高位跌八至九成，總之自問心血少，或者瞓身搏命都唔適合參與。

古勝