絲絲講場：財金界Fun享聖誕超歎鬥超搏

避寒族 李偉傑曬太陽

今個聖誕真太冷，大中華投資策略研究學會副會長（港股）李偉傑（Jason）尋晚就同屋企人搭夜機飛去泰國曬日光浴！Jason好多時想Family Trip都要就囝囝學校假期，可惜聖誕假唔長，所以近近哋去轉泰國叉電！

田兆源尋臨海盤靈感

信和置業（00083）營業部聯席董事田兆源會同家人去遠啲過澳洲放長假，感受陽光與海灘。佢話公司今年連奪多幅臨海地皮，去澳洲旅行會去唔少沿海城市，希望可以為往後臨海新盤攞靈感。事業心咁重，睇怕佢放假個心都離唔開火辣辣嘅香港樓市。

愛家族 蔡秀虹開Party

有唔少輪商代表選擇留港Home Sweet Home，唔通財金人中佢哋零舍愛家？法興證券上市產品銷售部副總裁蔡秀虹計劃同囝囝一齊整嘢食開聖誕Party，試吓整窩夫同海鮮，又會帶囝囝去迪士尼同睇燈飾，仲一早預備好玩具畀囝囝做聖誕禮物。

瑞萬通博香港上市產品銷售部主管翁世權呢位廿四孝Daddy，就會喺屋企同囝囝玩桌上遊戲，亦會同朋友聚會。

何啟聰余國春愛手工藝

至於瑞信香港認股證及牛熊證銷售主管何啟聰，就特登去花墟買棵樹，再掛乾果上去，即刻搞咗棵聖誕樹出來，成40cm高（下面嗰棵）。佢由細到大都好鍾意做勞作！

同樣咁支持手工藝品嘅，仲有裕華國貨董事長余國春。佢準備送畀孫仔嘅聖誕禮物，就係一套手工製皮革動物公仔（公雞），唔止好睇好玩，仲可以教孫仔英文。至於呢位國貨老行尊聖誕當然係留港陪孫仔玩，享受天倫之樂啦！

備戰族 湯文亮忙出書

紀惠集團行政總裁湯文亮今年唔外遊，話打算留港大量消費！買樓？唔係，佢話要喺「文字叢」中遊歷，整理文章，部署再出有關樓市新書。佢話新書內容係有關「強弩之末，樓市下跌前先兆」。絲絲諗，繼細價樓爆煲論後，今次佢又會預告樓市啲咩呢？

譚朗蔚準備開騷

趁呢個聖誕假「做功課」嘅，可能仲有富昌金融研究部總監譚朗蔚（Stevan），佢明年一月初開壇搞Talk Show，睇怕要留喺度備戰！Stevan係財圈中另一位出晒名廿四孝Daddy，今年聖誕有兩位愛兒兼有愛妻陪伴，佢話留港消費就心足矣。咁又係，佢最細位公子今年二月先出世，得11個月人仔，Stevan留港同朋友開聖誕Party，好過坐飛機啦！

忙爆族 禤惠儀去公幹

亦有人這個節日真太忙。臨近聖誕長假，唔少Banker都已經收爐放大假叉電去也，但渣打香港行政總裁禤惠儀（Mary）就要搏殺多陣，先有得放假抖抖。

事關Mary今年要代表渣打參加銀公訪京團，但訪京日期撞正冬至，返到香港補埋做節，剩番嘅假期只有大約一星期，所以Mary打消飛去倫敦過節嘅計劃，考慮近近哋上轉中山，打高爾夫球就算。

莫翠天飛台灣無得玩

不過論忙爆，睇怕無人夠申請緊虛擬銀行牌照嘅18 Financial嘅CEO莫翠天（Tin）忙，佢連聖誕都要飛去台灣公幹。會唔會順便旅遊？Tin話未必有時間。話時話，這個聖誕真太忙嘅，查實仲有同樣要開工嘅絲絲！

余絲韻