人人都用數據，係咪人人都知數據中心喺邊？東南沿海嘅省份係中國數據中心嘅集中地，但騰訊數據中心負責人鍾遠河就話，呢啲地區土地同電量成本高，數據中心規模難擴大，唔合乎成本效益。
數據愈用愈多，唔通第日要畀多啲錢先有得用雲數據？唔使擔心！騰訊已下定決心，要喺貴州嘅山洞入面鑿個大窿，成條隧道用嚟安放數據中心，到時成本將會大大減低。佢仲話，雖然地方偏遠會有配套唔成熟同信號差嘅問題，但公司會盡量在此之間取得平衡。
但山旮旯咁遠，搵邊個去？就係邊個都唔使去！騰訊三年前就做咗自動化嘅電子檢測工具，工作人員只需透過平板電腦或手機就可驅動系統。騰訊數據中心副總監高江話，日後人同機械人巡檢都會被淘汰，數據中心將會冇人當更。
余絲韻