Market Insight：石油板塊只宜小注

古勝都好耐無聽過「聖誕鐘，買滙豐」呢句話，昨日滙豐控股（00005）勢不可擋，一度衝上80元的八年新高，最終升2%收報79.95元。大象咁強，唔多唔少同股王騰訊（00700）落返400元樓下，基金經理搵安全的換貨對象過聖誕有關。

近期石油股都升咗唔少，在下早前都提過，若然係油價因素帶動板塊升勢，首選必然係主力做上游業務的中海油（00883）。睇番中海油股價由上周低位10.28元，回升至昨日高位見11.14元。中石化（00386）反彈幅度最細，因為兼營一定比重下游業務，好淡影響一半半而已。

老實講，喺「侵侵」主政下，唔見得油價會有大翻身機會，皆因「侵侵」主張油商增加開採，頁岩油產量不斷提升，再加上全球鼓勵使用環保能源及相關消費品，如天然氣、電動車等從供需的角度睇，油價難有爆升條件，但當然，有戰亂則另作別論。

照咁睇中海油價呢啲位追唔追得過？古勝認為，呢轉反彈未必能突破十一月上旬高位11.28元，若然真係受阻回落，有貨可把握獲利機會，候再試10元邊再作考慮，只宜小注怡情。

稅改影響不容小覷

在周四凌晨時間，大家都應已清楚聯儲局議息結果。近排美股狂牛肆虐，就業數據爆晒錶，執筆時利率期貨預示加息機會高唱入雲，87.6%加息四分之一厘，仲有12.4%約莫八分之一機會，一次過加夠半厘。如屬前者，資本市場早早已消化，係就係驚主席倫媽臨劈炮前玩鋪勁，攪局加半厘，到時股市必然有得震無得瞓。

當然，倫媽攪局的機會微乎其微，要驚反而是「侵侵」的稅改方案。最快聖誕前可以拍板執行，屆時美國利得稅唔單止追貼以低稅率引以為傲的新興市場，估計有2萬億至3萬億美元的美國企業海外盈餘及停泊現金，會因為新稅制回流美國，資本市場流向及美國企業投資海外意欲，恐怕會有翻天覆地變化。

港股處於高位，美國稅改對中港經濟不明朗因素加大，一八年的開局，睇怕唔會好似今年一條直線向上咁順利。

舜宇估值高易出事

根據以往經驗，如果沒有數十年老字號的經歷，純粹形勢比人強，受惠於行業周期，成功躋身藍籌的新貴，回看近十年被剔出的裕元集團（00551）、富智康（02038）及中國鋁業（02600）等，一旦行業及本身增長表現盛極而衰，好快便站唔住陣腳。

恒指公司責無旁貸

染藍唔夠兩星期的舜宇光學（02382）連日插水，輾轉由十一月公布進身成分股後的高位152.6元，撻到落昨日最低見101.2元。舜宇十一月營運數據麻麻，野村出報告踩多腳其實只不過係藉口，惟恒指公司趕潮流，就市場口味揀估值大幅偏離藍籌平均水平的股份，其實是責無旁貸。

舜宇業績按大行劇本，會由一六年的12.7億元人仔，三級跳去到一八年41億元人仔，預期市盈率都講緊30倍。如果係二三線股仔，咁都無乜所謂，但天價藍籌喎！業績少預測一個崩都唔得掂。

古勝