絲絲講場：李寧拉姪仔李麒麟入局
李寧（02331）終於有新血入董事局！不過，並唔係尋覓多時嘅新CEO，而係體操王子李寧阿哥李進位公子──年僅30歲嘅李麒麟，佢尋日起獲委任為李寧公司非執董。
每年袋逾百五萬
呢位屬於李寧家族第二代嘅「八十後」李麒麟，其實四年幾之前已經鋪路入局。
二○一三年李麒麟空降李寧公司嘅主要股東非凡中國（08032），任非執董唔使三年就升呢做執董，今年初仲簽新合約，除每年穩袋董事袍金15萬元外，仲有固定年薪130萬元打底。即是淨計喺非凡中國做執董，佢拉勻有成12萬元一個月！
李麒麟今次做李寧公司非執董，三年期合約標明每年董事袍金為21.5萬蚊人仔，就未計額外酬金。
佢今次進駐李寧公司，拉低咗董事局平均年齡，會唔會亦幫到手吸多啲年輕客幫襯佢哋品牌呢可！
余絲韻