Market Insight：港股投資情緒轉複雜

喺半個月前，全城興高采烈地睇住恒指十年來首次升穿三萬點，投行紛紛大合唱，摩通睇目標36,500點，大摩唔執輸唱到37,600點。

睇相佬呃你十年八年，每次見大孖沙對港股後市，大玩膽小鬼遊戲，鬥晒冷咁唱指數要睇幾多幾多，萬試萬靈，次次都出事。大家似乎忽略咗中港股市互聯互通咗後，港股多咗大量情緒炒家參與，而大媽風格一係唔炒，一炒就炒到爆，一爆有排醫唔番的慣性。

今浪大市由30,199點殺到落昨日低位28,134點，跌幅6.8%，惟年初至今計仲有28.7%進帳。不過，散戶對股市的「體感溫度」，卻足以令人冷得牙關打震。

買冷門股只有陪跌

皆因一來係今年下半年基本上係騰訊單騎領放，撐住成個市上，二三線股實際無乜點炒過，升市無份，到近兩星期大市回落又跟埋一齊跌，昨日超過140隻股份創52周新低。

部分專攻冷門股的魚缸散戶，享受唔到今年升市之餘，到挨年近晚先至嚟揩大鑊。

美股走勢成關鍵

即使有幸倉底有熱門股，今次一樣杰撻撻。近幾日北水要錢唔要貨，內地莊家及大媽至愛的騰訊高位都插16.9%，幾乎是恒指同期跌幅1.5倍，其他焦點股跌幅更係兩成開外，三隻北水藍籌，吉利汽車（00175）跌20.5%，瑞聲科技（02018）跌26.5%，新貴舜宇光學（02382）更跌30.1%。要知假若向來有愈升愈溝的不良習慣，好似近排咁跌法，好快輸到入肉。

走勢上，港股十月中到十一月初，指數曾反覆測試28,100點附近支持，企穩後再逐級攻上三萬點樓上。去到呢個位，技術反彈唔奇。短期形勢要睇實美股，聯儲局下周議息，會否繼續企硬（至少把口）明年加息三次，會唔會將減稅影響加入貨幣政策的考慮，都值得關注。

近排美股高位總是頂住頂住，神經刀「侵侵」忽然無風起浪，在中東多生事端，一旦美股回吐，港股唔排除要穿28,000至28,100點，逼另一浸牛仔打靶。近排港股成交在千億以上，上面蟹貨多籮籮，一旦破位，短期恐怕唔易上番嚟，如果係咁，大家可提早收爐。

半新股眾安有得博

古勝昨日提過網龍（00777），近排走勢古靈精怪，市升佢跌，市跌佢升。首三季業績見紅，虧轉盈都無助佢避過沽家糟質，昨日跌15%見21.25元，八月中裂口位都補埋，但見今浪由九月34.25元浸浸落，走勢認真麻麻。

精神領袖騰訊都崩堤，遑論掹車邊、曾經一股難求的熱爆半新股，昨日閱文集團（00772）落到75元創上市新低，收市跌6.9%報76.7元。掛牌後無段好睇的雷蛇（01337），剛推出電競專屬手機，但對股價毫無刺激，跌3.5%收報3.81元，連招股價3.88元都守唔住。

唯獨是隻貨乾的眾安在綫（06060）叫似啲樣，中段落到62.5元穿一穿掛牌翌日低位63元後，收市前拗腰跌少好多，收報65.3元僅跌1.5%。唔怕犯本又鍾意向9.9難度分挑戰的炒友，可玩即日博佢彈返上10日線，即70元樓上。

古勝