絲絲講場：工廠女工變富豪 Apple庫克讚不絕口
蘋果公司（Apple Inc.）CEO庫克今個星期訪問中國，除走訪知名科網企業美團，以及出席財富全球論壇外，其實佢亦抽時間去睇咗一間蘋果代工廠，仲讚不絕口呢位第一代女工變揸Fit人添！而呢間廠就係深圳上市嘅立訊精密嘞。
據了解，立訊精密係蘋果無線藍牙耳機AirPods嘅代工廠。
王來春與兄創辦立訊
庫克公開大讚立訊精密，究竟公司位揸Fit人有幾把炮？美國《福布斯》雜誌上月中公布一七年度中國富豪榜，依家50歲嘅立訊精密董事長王來春，憑住佢198.6億元人仔嘅身家，榜上排第94位，認真威威。
唔講你唔知，絲絲仲八到原來王來春同蘋果好有淵源！王來春正正係蘋果iPhone最大代工廠台灣富士康喺內地嘅第一批工人，21歲咁後生就加入富士康線裝事業部。佢打工近10年後另起爐灶，同阿哥王來勝拍住上，創立今日嘅立訊精密。佢哋間公司專門研發、生產、銷售各種電子連接線、連接器等，仲同富士康關係好密切。近年立訊精密多得富士康關照，負責組裝AirPods，事業自然更上一層樓啦。
本來參觀代工廠係例行公事，但庫克偏偏喺周三晚嘅財富全球論壇點名讚賞呢間內地工廠。庫克形容話：「大家有冇聽過ICT（LUXSHARE-ICT，立訊精密）？ICT生產我哋嘅AirPods。AirPods細細粒，但裏面元素成千上萬。要做到咁好嘅無線效果非常難，所以需要特別高端嘅技術先可以幫我哋實現。而ICT所做嘅產品，質量真係非常高。」
余絲韻