富斯同Kitty、彩兒食完飯，就一齊喺山頂兜吓圈。唔講唔知，原來富斯已84歲，不過依然健步如飛，難怪佢投資思路咁清晰。
富斯：香港係一個福地！又冇地震，我之前飛去日本，就遇過3次地震。
彩兒：我好開心今年又見到你，但點解你唔喺香港留多陣呀？
富斯：我每年嘅出差時間表都排到密密麻麻。上周六落機，隔兩日就飛台北、泰國傾生意，行程好趕。就算平日返公司，我都係好忙，每朝都要與同事開會，然後覆電郵、睇新聞等。
Kitty：其實你有冇諗過退休，享受優哉游哉嘅生活？
富斯：再數多30年就退休喇，你哋有冇睇過電影《The Intern》（實習冇限耆）。
彩兒：你想似戲中主角咁實踐老有所為嘅精神。
富斯：若畀我揀去邊度實習，我梗係揀番自己公司啦，然後同太太Report。如果Report畀其他人，佢哋應該唔理我，亦唔畀嘢我做。
Kitty：如果你退休，就真係公司嘅損失。
富斯：過獎喇。我成日要出差，冇咩時間同新人分享工作經驗，所以有啲唔開心。我哋公司冇階級之分，大家都可以坐埋一齊討論大市。每人都會有自己責任，擔任唔同項目嘅最終決策人。我最想負責每月公司花費嘅雪糕Budget，我一定會將佢乘二。
彩兒：行咗一陣你攰唔攰？
富斯：我鍾意行路，每日都行幾公里去搭火車。細個時，我咩運動都玩，如籃球及棒球等，又鍾意跑步，可惜依家跑唔郁。我平日好注意飲食，會多食生果同蔬菜，最鍾意食士多啤梨、菠蘿同藍莓等。
Kitty：見你實踐到健康生活，真係佩服！