孖妹S檔案：債券天王富斯：股市值博過債市
秋高氣爽，最啱梗係去行山。上個禮拜日，孖妹真係行咗轉，更榮幸邀請到由美國遠道而來嘅「債券天王」富斯（Dan Fuss）一齊上太平山，欣賞維港景色，同時探討環球金融大事。富斯席間分享唔少投資秘訣，並全面剖析股市以外嘅債市危與機。美國10年期債息近日升穿2.4厘，喺投資名宿曾揚言金融風暴即將來臨嘅重要時刻，孖妹原本冇晒心機，但好彩有呢位救星解疑難！
富斯：Loomis Sayles資產管理副主席 富斯（Dan Fuss）
Kitty：我超緊張呀！究竟呢位債券天王有幾勁？（與彩兒出發去見富斯）
彩兒：一早叫你做定功課。二○○八年，富斯被《財智》月刊Smart Money選為「全球最偉大投資者之一」。佢亦有債券市場「巴菲特」嘅美譽。事實上，富斯喺Loomis Sayles做咗41年，幫公司管理2,613億美元（約20,381億港元）資產。佢加入公司嘅時候，公司有350名員工，依家就增加至668名，公司主力做債券投資，亦涉獵股票投資。
Kitty：管理二萬億元資產！等於廿日港股成交！失敬、失敬！我呢一身裝束合唔合格？（早到30分鐘）
彩兒：我上年見過佢，佢好Nice！
富斯：好耐冇見，近排點呀？我對上一次嚟山頂，已經係二○一○年一月，同囝囝搭山頂纜車，好正！今次好開心再嚟，望住個維港景食飯，真係一流！
彩兒：食完飯，我哋一齊喺山頂兜個圈，吸收吓新鮮空氣吖。
評中港 增長快速 機遇無限
Kitty：港股今年升咗好多，你作為債券天王，有留意港股？
富斯：我哋有投資香港股票同債券。我哋一向視香港為最重要嘅窗戶，畀我哋尋找亞洲投資機遇。講真，依家股票市場比債券市場有更多投資機會，只不過美國人對債券熟悉啲。
Kitty：唔怪得你年年都嚟香港啦。
華債危機長遠受控
富斯：早喺一九八○年，我哋公司嘅業務已走出美國，投資海外市場，例如法國。20年前，我哋已將焦點放喺亞洲，好早就有投資喺泰國同新加坡。
我非常睇好亞洲經濟，相信佢係全球最有投資價值同增長最快嘅地區，特別係中國。只要花啲時間去發掘，就會有無限投資機會。我哋公司都有啲專投資亞洲市場嘅基金，好多美國投資者已放眼國際。
彩兒：中國嘅債務問題，你會唔會好擔心？據報，中國全國債務已達國家GDP嘅三倍。
富斯：中國政府好審慎，我相信債務危機長遠係受控。我哋依家都諗緊買啲中國債券，搵緊邊啲抵嘅。不過，大家揀長年期債券，要特別小心，只要美國經濟數據良好，通脹達標，以及技術工人全民就業，聯儲局就會加息，所以預期美國有加息同通脹嘅壓力。而好多機構投資者都轉買短債。
論美債 保持警覺 毋須過憂
彩兒：上周美國10年期債息已升穿2.4厘，因市場估美國十二月加硬息外，美國經濟好轉，加息有排玩，故債券出現拋售，債息狂升！野村早前警告，美國10年期債息處約2.4厘水平，金融市場已現逆轉警號。若債息跟住依家趨勢走，債市好快步入「熊市」。
Kitty：「債王」格羅斯曾預言，若債息企穩2.4厘樓上，就可能爆發金融市場嘅災難！佢仲話美國10年期債息由1.4厘升到2.4厘，係源於美國共和黨財策，包括稅改，以及放寬銀行監管，當然亦同通脹同聯儲局更鷹派有關。
富斯：我唔覺得有一個明確指標，話債息去到咩水平，債市就會冧。我覺得要有警覺性，但又唔使太擔心，我仲入緊市。
市場波動微 漸入熊市
Kitty：收益率曲線正常係斜向上，照道理，國家要同你借耐啲，就要畀高啲息，10年期債息係應該遠高於兩年期債息，呢個要留意。不過，息差愈縮愈窄，最近兩年期同30年期嘅美國國債息差仲一度跌到低過1厘，係自○七年十一月以來新低；兩年期同10年期嘅息差亦一度跌到低過0.5厘。收益率曲線就快打橫行，我有啲怯。
彩兒：自二次大戰，美債收益率曲線每逢經濟衰退前都會打橫行。
富斯：美國債券市場係少咗投資價值，美債收益率曲線趨平，信貸風險溢價非常低，市場波動減少，我會形容佢做Baby Bear Market，即是有步入熊市迹象。但我唔覺得環球股災好快嚟臨，因大跌市嘅出現，要係大部分投資者都憧憬個市向上，但依家明顯唔係，大家都非常小心。
測股災 目前未見重大隱患
富斯：除債息外，導致全球股災嘅導火線可以有好多。全球股災就似一個雪球，要一路向下滾，雪球先會愈滾愈大，但我暫時見唔到有好大隱憂，會令個市即冧。而且，雪球滾到中段會遇障礙物而減速，全球股市亦然，當面臨重大危機，央行就會出手。例如○七年，政府其實有能力干預，阻止金融海嘯發生，可惜因政治考慮，先至出手太遲。
（餐廳侍應唔小心撞跌枱上隻叉，Kitty一手捉住。）
富斯：投資者只要似你咁反應快，應該可以逃過一劫！喺呢個環球市場，其實仲有啲被低估嘅資產，只要我哋努力發掘，一定搵到投資機會。
中美關係 最大未知數
Kitty：有機又有危，美國嘅一哥地位咪好危？
富斯：雖然話，中國愈嚟愈強大，人民幣可能成為儲備貨幣，但其實中美合作，做到全球一家親，大家都會得益。唔少美國商人都想同中國人、日本人合作，只係暫時嘅政治環境唔係太支持。依家最大未知數係新興國家同已發展國家嘅融合，即中美關係唔知會演變成點。
Kitty：你有幾樂觀？
富斯：歷史話我哋知，中美關係發展良好嘅機率唔算高，但我仍抱有好大期望，覺得世界會愈嚟愈和平。反而，我對美國現屆政府嘅管治，以及美國同墨西哥嘅貿易關係，就有少少擔心。
Kitty、彩兒