Market Insight：鬆綁難內房冇運行

近半年，恒指在千位的關口，如兩萬八點關及兩萬九關，突破後都橫行一段日子，以時間換取空間，悶走晒班衍生工具炒家，又嚟挾兩三日破位，今次破三萬點，只用短短七個交易日恒指已縮番落兩萬九邊。一來今浪靠季績後騰訊一口氣撐起個市，整體市底唔夠穩，A股轉弱同美股變得波動。

鎖定利潤最緊要

嚟緊十二月節日氣氛籠罩，大環境只係啱大大聲細細注，手頭有貨贏緊大鑊的，不妨計吓數，提早收爐減磅穩陣。古勝覺得要特別小心內房板塊，今年大部分內房股股價在十月同十一月見頂後，開始唔多跟到個市。

今年內房銷售理想，業績爆燈幾無懸念，可是近兩季唔少資金追入係建基於一二線城市調控收效，「北上廣深」更見價量回落，博調控一如以往見好就收。近日住建部開會指唔可以讓樓市投機死灰復燃，官媒亦發文話調控不夠全面，似乎未來調控即使唔升級，惟擴大戰線至四、五線城市甚至政策恒常化的可能未可抹殺，短期內房股都睇怕無運行。

美國經濟憂由盛轉衰

稅改是否對有錢人及企業家比較有利都好，美國企業稅由原來35%大幅下調至20%，將會令政府增加1萬億美元（約7.8萬億港元）的預算赤字。早已債台高築，國債達20萬億美元的美國，恐怕短期勢必惡化，長遠經濟會否藉此加快增長，企業營收及稅付上升，抵銷稅率大減的影響？恐怕非短時間可以見到成效。

按「侵侵」如意算盤，稅改應可令後海嘯年代，在環球早已一枝獨秀的美國經濟火上加油。弔詭是，資本市場上，除華爾街股市義無反顧的樂觀外，匯市同債市的反應明顯有自己的解讀方式。美匯指數由去年底高位103.8，跌咗近一成，十年期美債息去年底高見2.6厘後，今年都只能在2至2.6厘之間徘徊，無理會倫媽今年一次，明年三次的加息預告。

最近美國兩年及三十年期債息息差，十年來首次收窄到唔夠1厘，美國短中長年期債息極度平坦，預示就算稅改過關，都改變唔到美國經濟快將由盛轉衰的命運，令在下擔心近日美股異常的抗跌力，是牛三末期的亢奮所致。

波動加劇 風險提升

好淡消息挾雜，今個星期個市到底係驚「通俄門」醜聞愈演愈烈，抑或就美國通過超過三十年來最大規模的稅改而高興，古勝並無水晶球，唯一可肯定係市場消息影響下，市況波動性風險會大大提升。

港股「成也騰訊，敗也騰訊」，當近排見網民話揸騰訊（00700）好過返工，因為一日進帳隨時多過一個月薪水，又見網上打油詩「問題能有幾多愁，沒買騰訊沒買樓」。憑多年魚缸經驗，大致都感受到短期騰訊狂態應係時候告一段落。

上周五騰訊在恒指比重由12%降至10%，殺傷力比預期大。到底是指數基金的管理人嫌錢腥要最後一分鐘先齊盤？抑或400元樓上衝動高追的炒家投降都好，周五騰訊在U盤時段被壓到落385元最低位收，由最高位計跌咗半張紅衫魚有多。

睇上周五錄得308億元紀錄最高成交（市場估追住恒指的被動基金沽盤都只係30億至40億元），睇嚟兩個假設同時存在的機會唔細。

古勝