絲絲講場：日清董事長唔同阿哥爭王國
日清食品（01475）上市目的明顯係要做大中國市場，絲絲好奇，佢哋董事長兼首席執行官安藤清隆貴為日清已故創辦人安藤百福嘅孫，又係日清日本（東證：2897）現任社長安藤宏基嘅次子，佢係咪曾經同阿爸勾手指尾，做掂中國業務就可以繼承日清王國？
港上市貪近內地
安藤清隆笑笑口話唔係，話自己好鍾意中國同香港，想一路留喺度，又話有個好優秀又好人嘅大哥，兄弟關係好好。意思會唔會係，唔會同大哥爭呢可？講得真委婉。
揀呢度掛牌，係因為香港比新加坡近內地好多，香港人又鍾意食佢哋嘅重要出品「出前一丁」，每當日本日清有咩新產品，都會先引入嚟香港，掂咗先擴展去內地及其他市場。
尋日招股記者會搵咗「清仔」同「海鮮味合味道杯麵」撐場，個個見到清仔嘅反應，絕對勁過雷蛇（01337）招股，至少絲絲冇見過雷蛇記者會時有人爭住同啲鍵盤與街霸手掣影相嘞。至於日清公開發售超購會否勁過雷蛇嘅逾290倍？信誠證券聯席董事張智威估會超購500倍。絲絲又睇吓點。
余絲韻