前兩日我搭電梯，由於公司上上下下有好多間證券行，有個我唔識的人就同佢身邊的朋友講：「今日贏幾多呀？」個朋友就話：「贏咩吖！個市升來升去都是嗰幾隻，擺到明借大藍籌托市啦！」
你知我啦，我一向都唔buy「假升」、「托市」這一類言論嘛，聽罷，我當然係覺得他們死牛一邊頸，本身想答佢，但就在這個時候其中一人就話：「依家個市，係唔識炒股的人先賺到錢嘅啫！」
聽到這裏，我登時退後一步認真思考一下：我最近有賺喎，唔通……他們又繼續講落去，有人就話：「係囉，我的客戶持倉都無升……（下刪幾十字）」哦，原來他們是認為個市升得唔全面，起碼幾隻主要的大藍籌都無升，於是就認定賺到錢的人肯定是走偏門！
我認為，這個世界無話識唔識投資的，賺錢的咪就係識投資囉！俗語有云盲拳打死老師傅，打輸的，你話你識咩都無用啦，係咪？
年初至今，確實跟到市升的藍籌不多，不外是騰訊（00700）、瑞聲科技（02018）、吉利汽車（00175）同中國平安保險（02318）。其餘就算是權重如中國移動（00941）都是食白果咋！但咁係咪就代表個市是「假升」，你就可以借此來為自己的劣績開脫呢？
不經不覺，恒指已經自年初的22,000點升至本周的30,000點樓上，一直不相信的人，係咪都要相信呢？
我成日同粉絲講：要於牛市裏賺到大錢，尤其是牛三呀，就一定要跟紅頂白。即是當你打開報紙、雜誌同電視，看到人家在瘋炒哪一個冧巴的，便照跟囉！只要控制好注碼便是了，而不是故意去避開這些強勢股，反而執迷於一些落後而且動也不動的龍尾股呀！
富昌金融研究部總監 譚朗蔚（作者為註冊持牌人士，持有騰訊及瑞聲）