Market Insight：飲食品牌股氣氛回暖

華潤啤酒是其中相對強勢的股份，再睇另外兩隻早前較弱勢的食品股，康師傅（00322）股價由九月約10.5元水平，反覆升至昨日創52周高位13.62元；中國旺旺（00151）由九月下旬約5.1元水平，升至本月上旬曾高見6.98元。

青啤博重估仲未遲

反觀估值一直相對穩定的統一企業（00220），股價由九月份高位7.84元，跌至近日曾低見6.25元，不排除部分投資食品股的基金在調整組合持倉。無論如何，整體食品股板塊有番啲人氣，點都係一件好事。

事實上，內地13億人口的消費群不容小覷，類似潤啤、康師傅、旺旺，都擁有內地知名的食品或飲料品牌，差極都有個譜。

不過，論呢類飲食相關的品牌股，在下呢刻對青島啤酒（00168）更感興趣。皆因近兩個月青啤股價有起色，在預期明年業務會有改善之下，似乎大戶已率先布置倉位。當然，朝日轉讓青啤股權的進展，亦為焦點所在。反正現價落注博重估，應該仲未算遲。

獨市生意優勢未變

市場都在注視騰訊控股（00700）季績表現，昨日收市仍能保住微升0.1%，收報388元。到底季績消息係錦上添花抑或紅到盡時，調整開始？好快有答案。古勝依然相信，騰訊股價迭創新高過後，短期股價較波動係在所難免，即使係一成至一成半的波幅亦不為過。

不過，從中長線角度睇，騰訊變相擁有13億人口市場獨市生意的優勢並未有改變，且正在透過分拆實現投資收益，短期股價會有波幅，但中長線就未搵到睇淡的理由！

講到騰訊，睇番其相關認購證街貨情況，有7隻認購證街貨在八成以上，街貨量合共約9.8億份。其中，有兩隻街貨量均超過99%的購證，行使價分別在375.08元及358.2元，都係一八年二月到期；另有兩隻街貨量超過八成的騰訊購證，行使價分別為403.43元及403.28元。從街貨量同行使價有咩啟示，就等大家自己領悟吓啦！

協鑫溢價收購雙贏？

踏入第四季，估值低迷的光伏股似有啲起色，保利協鑫（03800）股價由九月中旬0.88元水平，反覆升至昨日創下52周新高1.63元，差不多翻了一番。陽光能源（00757）股價亦由九月的0.17元水平，升至上月曾高見0.395元。

保利協鑫升得咁凌厲，其中一個消息乃上月公布收購林達控股（01041）29.55%股權，公司指交易可將業務擴至金融服務業及拓寬收入。反正見隻股悶咗咁耐，難得有新搞作，難怪股價可跑贏同業。

不過，古勝更有興趣係，協鑫以2億元入股林達，相等於每股作價約0.6678元，交易作價較公布交易時的市價有約五成溢價，即使以林達昨收市價0.44元計，都仲係低過保利協鑫的入股價，唔通真係咁益老散？

值得留意是，林達原大股東China Force今次悉售林達股權予協鑫，但仍持有林達一批價值1.58億元的可換股債券，一九年一月到期，票面息2厘，行使價0.285元，咁呢隻殼會唔會要等多年幾先至有運行，就不妨放長雙眼等着瞧。

古勝