絲絲講場:醒你10招等錢搵上門

抽新股,唔使十分鐘就賺近萬蚊,夠晒不勞而獲!睇真啲,就算係抽新股,都要打個電話落證券行或喺網上撳幾下,都用過吓力o架,只不過係付出嘅力,槓桿比率高咁啫。想出少少力就賺多多?得,絲絲就送你10招,不妨諗諗。

有本錢可錢搵錢

1、買指數基金

若係大忙人,或自覺唔識揀股,最簡單就係買「指數基金」,例如盈富基金(02800)。好多投資老手已證實,定期買指數基金係最簡單、風險亦唔太高嘅投資。

2、買iBond

既保守又想不勞而獲?咁不妨考慮政府幾乎每年都出嘅抗通脹債券(iBond),最低亦有1%回報,係幾乎唔使帶腦嘅投資。

3、買高息股

買入高息嘅公用股,可以坐喺度等收股息。不過股價可升亦可跌,所以要承受一啲風險。

4、買樓收租

投資住宅、車位、迷你倉、商舖、甚至商廈或工廈都得。如果食正升浪,仲可以享受埋樓價升值,不過本錢要多啲。講明,買嚟自住嘅唔算。

識電腦招數更多

5、搞個人社交平台

可以喺微博、博客、微信、Facebook等搞個人平台,放啲嘢呃Like呃Share。粉絲一多,賺錢機會就來,可以Sell自家產品外,仲會有廣告商主動搵你。

6、拍片直播做網紅

若閣下有表演欲,不妨拍埋片甚至網上直播,表演又好教人嘢又好,做網紅做KOL,收打賞做代言,月入十萬元不是夢。

7、開辦網上課程

不但可賺取學費收入,若畀廣告商睇中,可賺埋廣告費。最重要係成本低,即使唔成功,除咗心機,亦冇乜損失。

8、整網站收廣告費

若自問外型唔Sell得,又冇咩嘢可以教人,亦可以製作網頁,再爭取廣告收入,甚至將個網站賣畀人。

拓另類收入來源

9、「判上判」

假設你接到一個Job,日賺2,000蚊,你大可以每日1,500元「判」畀其他人做,自己「瞓醒覺」就淨袋500蚊。

10、創作等收版稅

反正你日日喺Fb發帖寫嘢,不如索性寫書出書等收版稅。唔止寫書,作曲填詞一樣有版稅收。

余絲韻