恒指於周一開市無耐，一度滑落400多點至28,100點邊。有傳人行行長周小川於網站貼文，關注內地金融系統上的槓桿性風險；更重大而突發的是：有「中東股神」之稱的沙特富豪阿勒瓦利德王子涉嫌貪污被捕，事件觸發了市場對中東資金可能拆倉的恐慌。結果，恒指的跌幅冠絕了亞洲以至全球。從來都係咁！港股一直都係大戶的ATM，在這裏找飯吃的人，預咗要任人魚肉。
好在，短暫的下跌嚇我唔走。我用自家的技術指標來審視了最強的幾隻大股，發現大市於十點三十五分已經跌定。此刻回首，係人都知道周一係大戶為了部署周二的井噴，而呃埋大家最後一批貨的小奇迹日！但願你無被震散倉位，或者是未敢追貨，眼白白睇住恒指於周二突破上月十九日的開市頂28,783點，而確認爆邊。我的愚見認為，恒指有機借今浪上埋30,000點添！
至於當前仍追得過的板塊，一定是非「三桶油」莫屬。首先，布蘭特期油於上月中突破了一七年初的頂位，即使有傳話油組已經計劃退出減產，其價格都一樣硬撐。接下來，剛剛於上周五破頂的是紐油，亦已經突破了今年高。
事實上，環球油股對比起新經濟的股份落後一大截，只要確認油價已經見了底，而個別如中石油（00857）等的股價又配合成交突破，實在不難找到有水位的股份坐轉順風車。
當然啦，假如你對大市或個股、板塊係「零感應」的話，都可以博下大霧抽新股。雖然大市到目前係牛幾，我自己都分唔到，但就近來股民認購IPO的熱度而言，我肯定新股市場係牛三！有好多人一聽到牛三就話個市就爆，其實頂位邊度係估出來的呢？會睇財經專欄的人入市又有幾恐怖啫？到有日連唔睇新聞、唔聽分析的人都畀冧巴你時至驚都未遲啦！
富昌金融研究部總監 譚朗蔚（作者為註冊持牌人士）