Market Insight：A股ETF宜分注儲貨

有望在入摩前發圍

典型商人性格的「侵侵」，上任至今針對中國的言論只限於講，並未有太多實際行動，其心底裏如何看待中國市場，不難揣測。今日「侵侵」訪華唔排除兩國會達成一啲合作，中美關係將會進入前所未有咁好的互惠互利時期。所以話，咪睇小一個多次破過產的賭徒，能夠登上美國總統之位，當有其能耐，見到中國呢個「金礦」，唔會同荷包對着幹。

正係呢個原因，加強了古勝對A股前景樂觀的看法。滬綜指昨日升上3,400點樓上，圖表顯示，滬綜指的重大阻力位在3,600點水平，相信必須要有政策及海內外來資金流的支持，才能突破，呢個場面，會唔會在明年中A股入摩前出現？反正在下對A股維持樂觀看法，若然唔知買咩股好，就吼A股ETF最慳工夫，唔使心急一注買晒，分注儲貨，類似安碩A50（02823）、南方A50（02822）及華夏滬深三百（03188），上車有心唔怕遲。

揸住中移戥佢傷心

古勝昨日執筆期間傳來閱文（00772）暗盤價曾高見92元，難怪一手難求！騰訊（00700）又生金蛋，推動估值向上，昨日以全日高位391元收市，升3.7%，股票愈貴愈有人搶，騰訊係典型例子。不過，騰訊將於下周三公布第三季度業績，唔排除季績前會見高位，之後要抖一抖，短炒最遲下周初可以睇位走一轉。

此外，今日港交所（00388）公布業績，昨日股價升1.9%，收報228.4元，照計若消息利好，應該可以抽穿八月初高位233.2元，直闖250元關，揸咗好倉的，要把握年尾標會機會啦。

同係藍籌股，愈平愈冇人吼，所講的就係股價好似飲咗「定型水」的中國移動（00941），望番佢幅走勢圖，今年以來表現跑輸大市，揸着佢都咪話唔心傷。不過，唔好以為落後就可以追，呢年來買佢追落後，真係喊得一句句。等到中移發圍，應該又可以諗吓沽貨去邊度旅行的時候。

復星料踏入收成期

港股昨日氣勢如虹，恒指一度高見29,017點，創近十年新高，主板成交1,151億元，真係似模似樣！睇勢個「趴地」會繼續，恒指在聖誕節前後衝30,000點並非不可能。

個股方面，睇來睇去，發覺隻復星國際（00656）估值都仲係平。公司早年已開始着手布局內地旅遊、醫藥、旅遊消閒、保險等領域的投資，過去四個財年盈利保持雙位數增長，今年上半年純利增長逾三成，未來數年公司將進入投資收成期，盈利前景可看好。

現時往績市盈率才14倍，也許早兩年出現過高層負面傳聞，一定程度令估值打折，但其實事件已過去，如今公司一切正常，趁芬佬未全情投入，散戶才能夠以呢個估值進場，呢啲位買坐中長線係實力之選。翻查資料，第三季以來，北水倉位又增持了復星78球貨，持倉量去到3.44億股或已發行股本的4%，期間股價累升六成。

近兩周復星現整固，落番20日線18.8元，可趁機落注，半年目標見望25元，相等於一七年度預測市盈率20倍。

古勝