絲絲講場：張天生高歌《往事只能回味》
股壇老行尊張天生除咗出名識飲識食之外，唱歌都係佢嘅強項，上星期香港證券業協會成立38周年暨新一屆董事就職典禮晚會，咁嘅大好日子，作為該會永遠名譽會長嘅張天生，就高歌來助興。
返鄉下搞生日演唱會
張天生當晚獻唱老歌《往事只能回味》，台下不乏「粉絲」上台獻花，好多觀眾更聽出耳油。佢原本仲想唱多一首老歌《午夜香吻》，但時間關係，最後冇唱到。
其實張天生真係好鍾意唱歌，平時逢周末、周日，佢就最愛歎吓紅酒、食吓好嘢、唱吓K。佢鍾意唱歌嘅程度，直情試過之前喺鄉下順德搞「生日演唱餐舞會」，與在場嘉賓一齊唱歌慶生。
余絲韻