絲絲講場：坦承屋企100萬都冇 賈躍亭輸在太勇
睇住自己創辦嘅樂視網（300104.SZ）畀融創中國（01918）董事長孫宏斌「接手」，面對連串指控，賈躍亭七月飛咗去美國。佢喺呢四個月有好多獨處時間去反思，終於開腔話覺得自己錯喺……
信用卡凍結 太太呻壓力
話說，樂視曾經喺手機、網絡等領域叱咤一時。但賈躍亭最近喺美國接受內地媒體訪問，話依家屋企連100萬蚊都冇，而公司喺美國嘅所有房產都已抵押。
佢仲話，一四年艱難時（當年樂視盒子被指違規、樂視網股價暴跌、賈躍亭本人患上胸腺瘤等）都冇講過咩嘅太太，今次都發大堆短訊話有壓力，因為依家多咗兩個女。太太話啲屋被凍結，只剩番一間用太太媽媽個名買嘅，連信用卡亦被凍結，只碌到二千幾蚊，太太甚至話唔信佢……
賈躍亭話，自己最值得反思嘅地方係冒進，方向同生態戰略係啱，但節奏上錯晒，佢感慨話應該循序漸進。
佢自樂視網裸退後，造車嘅FF（Faraday Future）目前幾乎係佢事業嘅全部。佢話長居美國兩次，都冇去過咩景點，只係愛做產品。但今次喺美國，花喺產品上嘅時間，連10%都冇，九成時間係為FF搵融資。
暫唔返中國 怕限制出境
佢又強調樂視網上市時百分百冇造假，若真係問題，一四年時就已經出事。
幾時回國？佢話有時間表，但目前首要完成FF嘅A輪融資，佢怕債務糾紛限制佢出境，暫時唔會返去。但佢話，內地嘅債務一定會還。
余絲韻