絲絲講場：戴敏娜為宗教大日子奔波
香港金融管理局助理總裁（法規及打擊清洗黑錢）戴敏娜（Meena），原來係宗教組織巴哈伊信仰嘅香港秘書長，今年係佢哋創始人巴哈歐拉200周年誕辰，所以Meena近半年都忙於籌備慶祝活動，今日（二十日）亦都會舉行慶祝活動。
巴哈伊信徒 每年齋戒
Meena話今年係佢哋紀念巴哈歐拉重要一年，已經收到唔少政要名人致賀，近月亦都大搞活動，包括展覽同埋喺公共交通工具車身賣廣告遊勻全香港。
原來Meena出生喺巴哈伊信仰家庭，父母都係信徒，佢就由中學時慢慢認識巴哈伊信仰，話好認同男女平等之類價值觀，於是14歲起就成為虔誠信徒至今，而且每年三月都會緊守齋戒要求禁絕飲食，佢話係要減輕物欲，唔會覺得辛苦！
余絲韻