Market Insight：手機相關股要抖抖氣

手機設備股洩氣，瑞聲科技（02018）及舜宇光學（02382）孖寶分別跌4.1%及2.8%。信利國際（00732）創完52周高位後，埋單掉頭隊低2.1%，靠A股液晶板塊當炒，連爆幾棍之後，信利睇個勢似要抖抖氣。

5G概念股中興通訊（00763）出首三季度快報，賺39億元人仔，按年升36.5%，舊年因為美國政府一筆過罰款，埋單要蝕23.5億元人仔比較，大長足之進，亦比最後賺緊錢的一五年度，股東應佔溢利32億元人仔多21%。昨日中興按例出埋盈喜，預告全年賺43億至48億人仔，每股盈利介乎1.03至1.15元人仔，現價計，市盈率約21.7至24.2倍，同十年平均估值22.7倍相差唔遠。

不過，大行對中國三大電訊商未來幾年在5G設備投資增幅，寄予無限憧憬，高盛最牛睇40元。但純睇走勢，如穿10日線可能會再試低些少，中興見27、28元都唔奇，想入貨的不妨睇多幾日。

新股唔再癲係好事

今年以來，港股恒指累升逾六千點，但IPO市場集資額表現卻失色，原因係少咗大型傳統企業來港上市，新經濟興起下，創業板新股雖多，但集資規模細，旺丁唔旺財。香港交易所（00388）都好想沙特阿美來港上市，但聽聞最快都要明年的事。

港股能健康成長

由於幾個主要市場都在爭取，最終花落誰家尚屬未知數，相信當中唔單只係錢銀上的考慮，還涉及到國際外交，所以只能等運到。

講到新股，昨日有兩隻新股掛牌，分別係春能控股（08430）及健升物流（08457），兩隻都係從事倉儲物流業，股價均高於招股價收市。不過，論升幅，再唔見到啲癲升局面出現！

早前監管部門表明要打擊新股圍飛等活動，冇得圍飛，股價就冇得挾高舞高弄低。

事實上，無論係從投資者同上市公司角度睇，長做長有總好過一夜暴富繼而落入死寂之境，單炒股票供求而完全脫離基本因素，與賭博無異。監管部門整治是有必要，希望撥亂反正過後，能讓上市企業同香港股市都能更健康成長。

炒股觀念與時並進

個市悶到癲，昨日恒指全日波幅得100點，靠U盤時段嘜高股王騰訊控股（00700），恒指先保得住五連升。不過，話分兩頭，十九大揭幕，托市的無形之手並無即時鳥獸散，反映市底其實仲係唔錯。

傳統想法唔啱用

昨日尾市恒指勉強交出14點升幅，收報28,711點，但主板成交笠晒油，縮到得番875億元，反而國指表現優於恒指，上升53點收報11,621點。

講開新股，隻閱文集團仍為短期市場焦點，大家都在等下周公布招股詳情，估計十一月中掛牌。投行大摩就估，按現金流折現法推算，閱文估值可達到446億至535億元，相等於一九年預測市盈率23至28倍。

做網絡文學都可以做到如此規模，網絡世界真係冇咩係唔得，大家千祈咪被傳統觀念所限，特別係支持創新發展的客觀環境正改善，對於青年人和新興企業的創造力，切勿輕言全盤否定！

古勝