絲絲講場：三代財俊睇87股災
今日係八七股災三十周年，三十年前嘅十月十九日（黑色星期一），美國道指挫近23%，觸發全球股市狂瀉，香港股市仲破天荒停市四日，話畀時間大家冷靜，結果二十六號復市嗰日恒指暴瀉逾33%，即是等如你今時瞓醒忽然冧9,500點！呢場八七浩劫有幾觸目驚心？得到啲咩教訓？驚唔驚股災好快又嚟過？以下老中青金融人一人一句，有笑料有洋葱。
眾利股票主席 董偉：切忌借錢
「當時股市停市四日期間，市場資訊唔流通，搞到一復市就亂，證券行孖展都Call唔切，期指又出現拖數，同業資金不足，股票交收變成用銀行本票，因為怕支票無法兌現。嗰次最大教訓係唔應該借錢買賣股票。」
股壇老行尊 蔡陳葆心：改變人生
「當年剛啱去咗美國探親，眼見美股十六號大跌，我十九號即不計成本沽清所有股票，連期指好倉都平埋倉，結果當日美股急瀉，到港股二十六號復市時幾乎只得我喺度收錢！八七股災改變咗我人生，要捉我入去交易所度做管理層！」
元朗股神 曾錦安：失眠四日
「當年好傷呀！當日喺銀行返工，開市前大堂相當嘈，但十點一開市恒指狂跌，成場一粒聲都無，全場淨沽冇入。停市四日，我失眠四日。我揸住期指，輸十幾萬，當年可以買到樓！依家諗番起都覺得驚，記憶永遠唔可以消除！之後買股票都有戒心，但都冇得驚咁多啦。」
民眾證券董事總經理 郭思治：估中出事
「當年我任職時富集團股票部經理，每日有3,000萬元生意。不過股災前幾個月，我覺得個市太熾熱、太唔健康，於是我就不斷叫人沽貨，時富當時喺我帶領下，一毫子損失都冇！雖然八七股災殺傷力好大，但好彩香港有出口、旅遊同建築業支撐，所以復原得幾快。至於今年，我覺得恒指升到上28,000、29,000點有回吐好正常，冇機會有股災。」
豐盛金融資產管理董事 黃國英：難再狂瀉
「當時我啱啱入大學，完全冇睇股市冇買股票，唯一印象係當時屋企人嘅朋友炒期指被證券行斬倉，輸咗好多錢，但唔斬應該輸得仲甘。我覺得依家股市體系成熟咗，慢牛繼續，就算調整都只會有最多一至兩成嘅洗倉式急跌，但時間唔會長，亦唔會傷及基本面。依家可能似『淡友嘅股災』多啲，唔追貨隨時跑輸大市。」
君陽證券行政總裁 鄧聲興：非常震撼
「嗰年我讀緊中學，唔太了解咩係股災，淨係記得睇新聞嗰陣好震撼，去飲茶嗰時又聽見有玩開股票嘅親戚損失慘重。八七股災畀我知道股票市場係周期性嘅，一定會有大浪細浪，不過拉番長嚟睇，個市整體都係上升嘅。今年我就唔覺得會再有股災。」
大中華投資策略研究學會副會長（港股） 李偉傑：雙親警誡
「我大概10歲，或者仲做緊功課。父母可能經歷過當年股災，所以有叫我千祈唔好聽人講就走去買股票，勢估唔到依家我可以解答到大家對股票買賣嘅疑問。以往股災大多突然降臨，災前市況都處於興奮狀態，依家都會未雨綢繆，若騰訊（00700）、滙控（00005）、友邦保險（01299）及內銀股腳軟，大家就要小心。」
富昌金融研究部總監 譚朗蔚：上試三萬
「嗰時我4歲，唔記得做緊乜，可能讀緊幼兒園。依家睇番，我覺得每次股災都會有啲先兆，例如匯市異動，而依家港股仲係牛氣沖天，經濟、企業業績都對辦，相信恒指明年首季有機會上試30,000點大關。」
阿仕特朗資本管理投資經理 劉明琪：無得預計
「當年我應該仲飲緊奶，或者玩緊，所以完全唔知道發生咩事，父母亦都無炒股，所以對屋企冇影響。雖然市場一直擔心股災將會重臨，不過我就覺得現時風險唔高，同埋股災好似恐襲咁，預計唔到啦！」
余絲韻