Market Insight：華潤啤酒具規模優勢

早前古勝留意到紅籌股北京控股（00392）及上海實業（00363）雙雙發力，其實香港中旅（00308）、深圳國際（00152）等紅籌股價都喺高位，大家不妨留意實力紅籌股的投資機會，如昨日華虹半導體（01347）急升12%、華潤燃氣（01193）升逾2%。

講開華潤系，雖然華潤啤酒（00291）不再係藍籌，但股價反而有運行，皆因公司主力做好啤酒業務，無論業績和估值都得到裨益，相信在內地消費股之中，奉行唔大唔買的宗旨的話，在行內手執牛耳的潤啤是優秀之選，且可留意朝日啤酒擬出售手持青島啤酒（00168）股權，無論潤啤有冇機會沾手，抑或落入其他同業手中，反正有人爭就有利行業估值。

再講，潤啤現時市值已回升至705億元，話唔定唔使幾耐又有機會再去問鼎藍籌股之列，已持貨者大可以安心穩坐釣魚船，若有機會回試20元承接，更可視為中長線增持的好機會。

中食藉業務重組彈出

古勝啱啱先話除咗十九大消息之外，唔好咁早為後市走向下判語，因為「侵侵」可能喺十一月訪華。言猶在耳，昨日就傳來美國白宮證實「侵侵」將於十一月八至十日訪華。斷估中美兩國元首會面，應該會有一些關於兩國共同利益的事情得到落實，到底對市況刺激有多大，不得而知，但照計此前可以排除有重大壞消息的想法，應不為過。

昨日講及食品股重估潮，見中國旺旺（00151）創52周高。不過，更令人驚喜係隻中國食品（00506），股價急升13.64%報5元，成交3.22億元。

中食股價急升，主要係公司宣布擬以約50億元出售酒類業務予控股股東中糧集團，由於其酒類業務仍處於虧損，藉着今次交易能套現並改善資產負債表，且將派發特別股息每股0.93元，而此後公司將轉型為純飲料產品企業，皆應有利重估。反正重組消息等足兩年有多，總算有下文，股價升得有道理。

炒影子股要識執生

本周兩地市場一切以「穩」為先，港股昨日都好似被點咗穴，全日波幅僅135點，主板成交回落至838億元，似乎大家都在等候重大消息一擁而上開個「大趴地」，係真唔係？好快有答案！

A8獲炒友青睞

港股企定定等運到，藍籌波幅收窄，游資把握機會炒冷飯，繼續有落後大價股及其他二、三線股起航。好似上文提及閱文上市全城觸目，有炒家睇準積極拓展網絡文學業務的股仔A8新媒體（00800），昨日股價急升逾8%，收報0.49元，成交增至1,099萬元。

點解睇中A8？原因係集團通過與北京掌文信息技術的合作來儲備IP，以取得大量的文學版權資源，概念與閱文從事的網絡文學有點相似。隻新股子憑母貴咁難認購到，難得搵到隻現成影子股炒吓，有智慧不如趁勢，但可炒幾多日，大家都冇水晶球，定好止蝕位自己執生。

古勝