絲絲講場：股神代言金霸王 笑晒電大媽
股神巴菲特一四年收購金霸王電池，最近仲做埋佢哋代言人，幫佢哋喺中國市場推廣。
「嘜頭」在內地夠分量
講番啲新宣傳相，絲絲所見至少有兩款，都係巴菲特笑晒咁，孖住嗰隻金霸王吉祥物粉紅賓尼兔同一粒電池，一人一兔齊齊豎起大拇指，背後就六粒大字「巴菲特的選擇」。睇落真係毫無花巧，齋憑巴菲特嘅名氣已經夠「照」。
其實，巴菲特喺內地一向人氣高企，連佢嘅愛股可口可樂舊年都喺內地推出印有股神「嘜頭」嘅特別版櫻桃味可樂。
唔單止咁，每年巴菲特投資旗艦巴郡召開股東大會，都有數以千計中國人專程飛去股神大本營奧馬哈「朝聖」，內地亦有網站將股東大會嘅內容即時翻譯成普通話，畀去唔到現場嘅巴菲特粉絲睇，可見股神嘅號召力。
余絲韻