恒指自年初起連升八個月之後，終於都於九月斷纜喇！正當大部分的人都以為物極必反、有咁耐風流（下省五字）、泰極否來（唔好誤會，我唔係明張目膽個friend呀，我係唔識否極泰來的相反詞咋）時，人行於上周末已經殺你一個措手不及，推出了一記定向降準！
哇！佢的威力簡直有如步驚雲的排雲掌，將10日同20日線，仲有28,000點關口等任督二脈統統打開。埋單計數，恒指不但刷新了今年以來最大的單日升幅，還收於廿八個月高位。無咗北水，大市的成交都有1,000億元過外，認真勵志！
所以話，我於上個星期尾已經同大家講，無得跟A股啫，可以跟美股嘛，無人話無咗北水我們就一定要跌到十月九日嗰喎！
講開又講，阿爺又夠唔話得啦！標普於九月下旬先後調低了中、港評級，我唔係事後孔明呀，我於翌日就已經話：穆迪於五月時都做過類似的傻事，結果阿爺將人民幣的離岸價一挾，班外資淡友都已經出晒外太空啦！標普竟然到今時今日都仲未醒覺？仲來刺激阿爺？
內銀股於十一假後返來真係好似放煙花咁款，單是工商銀行（01398）、中國銀行（03988）同建設銀行（00939）三大重磅股，就貢獻恒指近300點的升幅！
換句話講，即使其餘的股份、板塊唔跟升，恒指要收於27,900點樓上都無問題，收復10日同20日線可以話係綽綽有餘啦！
從今日起計，市場已經正式步入「十九大」會議召開前的兩星期倒數階段，既然人行都開大水喉來維穩，咁我唔客氣喇，一於攞個桶去接！內銀中，論盈利增長、股價的爆發力，都以招商銀行（03968）最首屈一指！相信新高可期。照咁睇，恒指呢round應該上到28,588點喇啩？
富昌金融研究部總監 譚朗蔚（作者為註冊持牌人士）