Market Insight：港股爆上食住個勢

本來，古勝對升市都有啲保留，但睇見指數好耐未試過咁升法，而且北水本周暫停，但港股都有成千億成交，又真係唔係講笑！若然呢浪真係抽穿一五年港股大時代高位28,588點，相信有唔少錢要落場追貨，唔通今年恒指真係要見三萬點！

現時的策略，若然係唔信後市繼續升，都忍忍手先別心急開淡倉，想反手追番啲貨的話，都係主力集中有政策市支持的重磅中資股為妙。好似昨日升市，內銀股集體發力可謂大功臣。

論消息面，當數上周末人民銀行發放特急文件，將定向降準範圍由現時的小微企業及三農貸款，擴大至普惠金融領域貸款，但政策喺明年才開始實施。

官方發放利好訊息

咁急公布，當然有其原因。其中一個揣測，正是本月中旬十九大召開前，官方維穩金融市場的其中一個舉措。故此，雖然今次定向降準對於刺激資金流的效果要等數個月後先知，但官方出招利好的訊息卻足夠提供炒作藉口。

四大內銀 最睇好建行

內銀股昨日下午升幅擴大期間，古勝在東網Money18「貼市貼士」亦有即市點評四大行走勢。工商銀行（01398）以大成交破頂，是浪有勢一試6.6元水平阻力，回吐宜守6元。建設銀行（00939）在八月下旬高見7.1元後回吐，惟100日線有支持，短線有機會再衝頂。

農行（01288）的表現相對落後，今年以來大部分時間股價在3.5至3.8元水平上落，現價值博率相對失色，相信會在板塊升浪尾段先會見真章。另中國銀行（03988）仍處去年首季延伸的上升軌，惟短線股價在4.2至4.4元阻力不輕，重要支持在3.75元。

若然看官想搞內銀股或相關衍生工具，相信仲係工行同建行會行先，其中在下又會以建行作為首選。

耐世特值博率不俗

此外，論板塊表現，汽車股亦同樣十分醒神！隻吉利汽車（00175）又再破頂，高位見過25元，多得摩笛唱好；連帶其他如東風集團（00489）、長城汽車（02333）及廣汽集團（02238）升1.9至4%。講到汽車相關股份，又睇吓隻較少人睇，但呢期股價表現幾堅挺的耐世特（01316）。

該公司主要從事汽車製造、轉向及動力傳動系統以及零部件業務，主力做美國市場，其次是中國及墨西哥，另兼營歐洲、南美洲及亞太其他地區市場。耐世特今年上半年純利1.8億美元，同比增長兩成，毛利率上升1.4個百分點至18.8%。現價一六年度往績市盈率才14倍，睇完中期業績，唔難發現呢隻股估值仲係平。

走勢方面，昨日升市下其股價創新高見14.76元，對業績前景有信心，不妨分三注入市，就現價先買一注，睇住再加注，中線持有，值博率可能會吸引過現水平追吉汽。

古勝