絲絲講場：思捷多賺兩倍 員工獎勵反縮
公司好景賺多咗錢，大手筆獎勵吓班員工都好合理，谷吓士氣都好。
不過，話說思捷環球（00330）九月公布全年業績，賺成6,700萬元，按年大增足足2.19倍。員工諗住公司今年獎勵會疏爽啲？真係唔好幻想咁多喇。因為思捷啱啱公布嘅僱員獎勵計劃，涉及金額得1,053.4萬元，按年大縮水六成八。
CEO袋少5球
根據思捷嘅僱員獎勵計劃，行政總裁馬浩思、財務總裁鄧永鏞兩位高管今年參考獎勵金額就分別為283.8萬元同埋58.63萬元，睇落好似唔錯噃。之但係絲絲望番舊年十月，思捷公布嘅僱員股份獎勵計劃，當時就好豪爽咁用3,290.3萬元嚟買股份獎勵畀獲選僱員，上述兩位高管嘅獎勵金額，仲多到分別有成836.71萬同235.6萬元。
轉型見成效
至於其他高級管理人員嘅參考獎勵金額亦都大縮水，上年明明都有2,218.04萬元，但今年只係得番711.02萬元。絲絲記得舊年思捷份業績真係麻麻哋，截至去年六月底止年度，要喺多項特殊收益帶動先至轉賺2,100萬元。今年集團轉型計劃初見成效之下，思捷純利先至按年大增2.19倍咋。
其實公司搵到錢，員工都應該出咗唔少力，好應該分享成果。咁多位老細，派發獎金嗰時鬆手啲得唔得呀？
余絲韻