Market Insight：手機股受惠升級潮

淡友唔容易搵食

野村出報告唱好舜宇，預料受惠於內地智能手機硬件升級潮，舜宇新應用技術如3D感應模組明年開始提供貢獻，將目標價由122元提高到145元。

手機設備股令淡友聞風喪膽，好似幾個月前狙擊瑞聲的「葛咸城」，無晒聲氣一段日子。講到底，大牛市裏面，好消息固然要炒，壞消息隨時都當成好消息咁看待，個市恃住錢夠多，你肯嚟有限博無限（沽空輸起上嚟，理論上可以無上限），自然引來一班炒家老實不客氣同你對賭，你愈空佢愈買，實行挾到你無得走。

研究機構GMT Research昨日出報告狙擊國藥控股（01099），認為公司錯誤陳述現金流狀況，也刻意粉飾資產負債表。國藥午市殺過一浸落33.2元，尾市一條氣炒番上，以近全日高位34.55元收，升0.4%，睇見報告出街第一日威力都咁弱雞，即使無瑞聲咁誇張，睇怕今次炒鬼又會閂埋門打仔，挾到班淡友棄械投降。

國企炒重組要放長線

期指結算前夕，好友大戶稍為加多兩錢肉緊，恒指升129點收報27,642點，50日線唔失但又未叻到升穿10日線，成交縮返八字頭。結算之後輪到A股放長假，昨日氣氛似係大媽提早收韁。

下半年以來，關於國企重組消息不絕於耳，似乎真係加速推進。中國船舶（600150.SH）及中船防務A股（600685.SH）昨停牌，涉籌劃重大事項。中船防務H股（00317）股價高開16%見全日高位14.52元，埋單都升逾一成，反映市場憧憬系內重組活動將惠及公司。

事實上，中船集團和中船重工兩大集團重組誘因甚大，相信二合為一是遲早問題，系內公司具注資概念，但到底幾時成事冇人知，所以博呢類股，都好考耐性。

好似電力企業重組之聲已流傳甚久，早前有成立「神電」（神華與國電合併）的消息，但至今未見官方公布詳情同時間表，真係睇好行業重組同合併後超級企業發展前景，都要好耐心坐定定等消息，炒出炒入勞神之餘，亦未必能贏到大錢。

中移80元樓下收集

講到國企重組，其實中糧系都可以望多兩眼。蒙牛乳業（02319）近兩個月股價成功突破16元阻力區後，如入無人之境，本周初調整成功守穩20元關後，昨日又再衝穿21元阻力位，看來升勢欲罷不能。

同系的中糧控股（00606）及中國食品（00506）在八月至九月初升完一浸後進行調整，現價都近承接區，不妨留意有冇翻兜機會。

此外，古勝相信，當十九大人事底定過後，呢幾年進展較慢的改革環節，有望提速，國企改革會係其中一個範疇。當中，三大電訊企業改革當中，中國聯通（00762）的控股股東聯通A股（600050.SH）已落實展開混改，相信另外兩者的股權改革亦唔會拖得太久，中國移動（00941）在80元樓下可以分注作中長線收集。

古勝