北水對港股影響力有多大，昨日應畀到大家一個重要啟示。早市德國大選塵埃落定，美股場外微軟，但整體變動唔大，反觀港股，近排大媽前仆後繼的內房股，因中央再收緊調控措施拖累，火燒連環船下，內房唔單止塞滿十大跌幅榜，連整個港股氣氛都受牽連。
恒指全日級級落，收市跌380點報27,500點，國指跌196點收10,912點，跌市成交不跌反升，較上周多近兩成至1,109億元，反映現貨沽壓唔細。
上周五恒指連失10日及20日線，加上周五的一跌令周線圖出現倒轉錘陰燭的轉弱情況，唔可以坐好倉過夜的信號已經出現。只係估唔到上周聯儲局言論頗「鷹」，出乎市場預期重伸年底前要再加息一次，踩唔冧個市，反而內房股的骨牌效應的影響力更大。
走勢上，昨日恒指即市低位27,476點，已一度低於50日線27,487點，上一次恒指收低於50日線，已是七月初之時。大市遲遲唔肯上試28,588點，淡友已累積足夠彈藥反攻，連跌兩日之後，中短線轉弱已可確認，九月六日的低位27,421點已不容有失，否則觸發的追跌沽壓將會更大。
John Mullen