Market Insight：新能源車股揀龍頭

今次觸發內房股集體跳水，除咗係有評級公司調低內地信貸評級之外，上周內地多個城市出台新的調控措施，不排除嚟緊會有更多城市出台新政策，加上九月份內房銷售數字唔多靚仔，要沽都唔係冇理由。事實上，內房股都累積不少升幅，長假期前大部分都選擇沽貨獲利鎖定利潤，又唔係咩意料之外的事。

比亞迪考驗承接

其實，昨日另一個跌得甘的板塊係汽車股，普遍要跌半成，先前升咗咁多，調整唔需要有太多理由，尤其隻比亞迪（01211），由46元水平一口氣抽穿70元關，調整半成又唔係咩大不了，不妨靜心觀察承接水平再作部署，如有平貨在手又睇好新能源汽車，呢隻股有轉勢迹象的睇法暫時尚未有改變，中長線不妨睇定啲先。

當炒股集體向下堪憂

古勝始終認為，新能源汽車產業係當今領導人銳意用心經營的重點工業，更是經濟、國力的一個指標。

過去全球汽車業一直由已發展經濟體作主導，內地難以完全掌握傳統車技術。不過，隨着內地汽車消費市場不斷發展，本地產業鏈日趨完善，產業政策刻意扶持本土電動車產業發展，並充分發揮內地大市場優勢，要反客為主。是故，新能源汽車概念唔會只係玩三、兩年的，而係實實際際有國策支持的重點產業，龍頭股長線值得投資者耐心播種。

回說呢期當炒的內房及汽車股昨日集體向下，呢個現象唔多盞鬼，但魚缸有買有賣才有成交，咁大成交又係咩資金接貨？到底沽貨獲利的資金，係留喺場內抑或獲利離場？十月中旬十九大會議前係咪升浪已完，抑或最後上車機會？

在下暫時難下判語，都係睇到兩、三日先下判語，反正在下會睇實條50日線（27,487點）做決定，若在一旦失守，一周內未能收回失地，就要提防有較大調整在後頭。

零售板塊難聚炒味

上周騰訊（00700）宣布入股的中金公司（03908），昨日中金亦急回一成，至16.2元收市，回吐壓力都幾大，成交5.89億元。

上周五權益披露資料顯示，GIC於上周四減持中金433萬股，就連基金都趁高減持，難怪股價回壓咁大。不過，若然落番15元水平，古勝又覺得可以睇位分注作中長線收集，皆因呢隻股質素確實唔差，睇好內地金融市場同金融科技發展，呢隻股絕對係長線持有的實力之選。

「金九銀十」，嚟緊十一黃金周，消費股有冇得炒？老實講，黃金周消費股表現冇特別都經已好幾年，相信今年都唔會有例外，畢竟第一次才來港旅遊的內地同胞愈來愈少，二來高消費內地旅客的旅遊選擇甚多，用不着喺旺季來香港人迫人。黃金周期間內地旅客係多咗，但對整體零售市道的刺激作用已今非昔比了。

不過，昨日仲係見到莎莎國際（00178）逆市升3%、六福集團（00590）升2.3%、周大福（01929）微升0.5%。只係論基本因素，在下都係選擇學人講句：「I'll pass」﹗

古勝