Market Insight：汽車股仲係有選擇

港股昨日靠穩，上晝望住魚缸，最矚目係隻比亞迪（01211），因為摩根大通出咗份報告，將該股目標價定喺100蚊，消息刺激其股價一度搶高至71.95元，午後一度見急速回吐，但67至68元水平見支持，收報68.9元，大升12.6%，成交達27.3億元，真係似模似樣！既然新能源汽車龍頭股已確認啟動，板塊內其他股份亦會陸續開波，看官要好好把握！

工信部話逐漸以新能源車取代汽油及柴油車輛，以中國全國汽車保有量超過2億輛，新能源車二○年講緊目標產量只係700萬輛左右，幾時先換得晒？真係天曉得！斷估唔會淨係得比亞迪及吉利汽車（00175）可以受惠，搵今年內地十大電動車銷售排名，北京汽車（01958）屬五強之內，當然對比傳統車銷售比例唔大，不過炒股講氣氛唔好講實際，昨日見北汽升得少，不妨試試。

炒注資概念股要睇清

昨日另一個爆炒的消息係中航工業（00232）宣布，向母企收購美國主流通用航空飛機製造及分銷業務，作價24億元，消息刺激其股價一度飆高至0.69元，收報0.66元，勁升80%。

同系的幸福控股（00260）亦曾升逾兩成，收報0.129元，升18%。就連其他公司名有個「航」字的都炒一轉，如中航科工（02357）升近半成、中國航天萬源（01185）升16%、航天控股（00031）升8.6%。

查實喺呢批股份之中，真正從事航空相關業務的不多，即使今次獲母企注資的中航工業，亦只係從事物業同貿易業務，依家獲注入航空相關業務，可謂意義重大。

在新定位下，公司未來可能尚有注資行動，故股價才可以如此大幅飆升。至於話仲追唔追得過，最好等試番昨日平均成交價約0.56元承接先至諗就穩陣啲。

兩極分化唔再易玩

在魚缸打滾咁多年，經歷股市升升跌跌，近年感覺最大的變遷，乃以前香港基金經理主要係外資與本地薑天下，睇市揀股總算有規有矩，找顧問公司行業報告睇完，約見公司管理層，最後砌埋份股份估值模型，先會真金白銀買落去。

揀股漸本末倒置

隨住港股A股化，傳統基本因素分析未至於失靈，但已好難繼續獨步武林，往往跑輸蜂擁南下的內地莊家甚至股市大媽。後者南來收乾貨後，想點玩就點玩。

港股也漸漸二分化，有北面大水喉眷顧的鑊氣股，貴貴都無問題，反觀沒有大媽射住的，幾平都無人吼。久而久之，適應A股市場口味，窺探熱錢流向揀股本末倒置，成為港股新形勢，都唔知係進步抑或倒退！

近排中大市值的中資暴升股，日日都有三兩隻上榜，朋友問值唔值得追，有時古勝都被迫轉換話題，事關叫唔好買怕隨時阻人發達，叫放膽去追，又驚你身手唔夠敏捷，上咗車唔識落車，依家呢啲市況，真係左右做人難。

古勝