絲絲講場：飛達孟加拉廠千人排隊見工

話說飛達帽業控股（01100）副主席顏寶鈴（顏太）話，佢哋孟加拉廠漸上軌道，喺當地算好出名嘅企業，佢哋最近請人，吸引咗過千人喺廠外排隊，原本想請200個員工，最後都變成500個！顏太仲話，等新廠起好，到時要再請多3,000幾人添。

尋日絲絲仲見到主要負責公司美國業務嘅顏太細仔顏肇翰（Alex），咦，清減咗好多喎！原來佢年底結婚，為咗大日子影相同着衫好睇啲，所以決定瘦身！Alex話，呢兩個月每日只食1.5餐，大概每日只吸收1,500卡路里，而重點係每日做2至3個鐘運動，所以短短兩個月內就減咗25磅，不過佢話距離目標仲有10磅！

余絲韻