絲絲講場：道指百年破100萬點？股神話嘅！

「沽空美股一定輸」

道指周二收報22,370點，換言之較現水平再漲40倍？股神話，100年前道指夠只得81點左右，當時邊個諗到百年後今日會去到2萬幾點！所以再過百年破100萬點唔出奇。

股神仲話，自八二年《福布斯》發布首份美國400大富豪榜以來，已有約1,500人上過榜，呢批最有錢嘅人共通點係，冇一個係沽空者！佢話美國立國二百幾年，睇淡美國沽空美股嘅一直輸硬，將來都係。

不過，道指破100萬點大概唔會係股神有生之年嘅事，「啲人一講到話活到100歲時，我就好興奮。我今年87歲了！」佢話美國現時有5萬幾個百歲或以上長者，男女比例係1比5，仲話「我哋應該開始考慮變性……」

化身A.I版任你問

喺美國奧馬哈市生活嘅股神，多年來出名睇市揀股準，故有「奧馬哈先知」之稱。你都有嘢想問「先知」？《福布斯》百周年版就搞咗個前所未有嘅「A.I封面」，封面係巴菲特大相，大家可以用手機同佢互動，問咩都得，佢經視像答你。

有人問到美國北韓關係及巴郡（巴菲特投資旗艦）揸住幾多Apple股份，股神會叫佢哋自己搵答案；有人問攞冧巴，股神一如以往拒絕。

經視像答你問題嗰個，堅係巴菲特本人，只不過係佢事先錄定咗33個視像，再由人工智能即時決定用邊個視像來答閣下嘅問題。就算100年後，大家仍可同股神咁樣「傾偈」，到時道指唔破100萬點亦可搵佢「算帳」，嗱假如閣下都依然喺度嘅話……

余絲韻